اینجلینا جولی اور بریڈ پٹ میں صلح کی کوششیں

لاس اینجلس: (دنیا نیوز، ویب ڈیسک) ہالی ووڈ کے ماضی کے مقبول ترین جوڑے بریڈ پٹ اور اینجلینا جولی کی درخواست پر طلاق کے مقدمے کی کارروائی عارضی طور پر روک دی۔

میڈیا کے مطابق بریڈ اور اینجلینا نے گزشتہ برس ستمبر میں طلاق کی درخواست دی تھی۔ بریڈ پٹ اپنے بچوں کو اپنی تحویل میں رکھنا چاہتے تھے لیکن عدالت کی جانب سے بچے اینجلینا کو سونپ دیئے گئے اور بریڈ کو ان سے ملنے کی اجازت دے دی۔

انہوں نے عدالت کو درخواست دی کہ وہ اس سلسلے میں مذاکرات کر رہے ہیں اور مقدمے کی کارروائی معطل کی جائے، جو منظور کر لی گئی۔

خیال رہے کہ ہالی وڈ کی معروف اداکارہ اینجلینا جولی نے 2016ء میں بریڈ پِٹ سے طلاق کی درخواست دی تھی۔ اینجلینا جولی اور بریڈ پِٹ 2004ء سے ایک ساتھ رہے تھے، تاہم انہوں نے اگست 2014ء میں شادی کی تھی۔ ان دونوں کی پہلی ملاقات فلم ’مسٹر اینڈ مسز سمتھ‘ کے سیٹ پر ہوئی تھی اور اس کے بعد دونوں اکھٹا رہنے لگ گئے تھے۔ ہالی وڈ کے اس معروف جوڑے کے 6 بچے ہیں۔ اینجلینا اور بریڈ کی جوڑی کو مداح پیار سے ’برینجلینا‘ بھی کہتے تھے۔

بریڈ پٹ سے علیحدگی کے بعد ایک انٹرویو میں اینجلینا جولی نے کہا تھا کہ بریڈ پٹ سے علیحدگی کے بعد سے بہت مشکل وقت سے گزر رہی ہیں۔ یہ بہت مشکل ہے، میں اکیلے رہنے میں لطف محسوس نہیں کر رہی ہوں، یہ ایسی چیز نہیں تھی جو میں چاہتی تھی۔ اس کے بارے میں کچھ بھی اچھا نہیں ہے۔ یہ صرف بہت کھٹن ہے۔

ان کا کہنا تھا کہ میں ایسا ظاہر نہیں کر سکتی کہ یہ میری زندگی کا مشکل ترین وقت نہیں تھا لیکن میں یہ سوچ کر آگے بڑھتے ہوئے اس سے نکلنے کی کوشش کر رہی ہوں کہ یہ انسانی زندگی کا حصہ ہے۔ ہو سکتا ہے کہ یہ لحمہ دوبارہ یاد آئے اور حقیقت میں ان دنوں کو گزارنے کی کوشش کر رہی ہوں۔