لاہور: (ویب دیسک) معروف پاکستانی اداکارہ و ماڈل ایمان علی نے کہا ہے کہ خلیل الرحمان قمر کے لکھے کسی ڈرامے یا فلم میں کام نہیں کروں گی۔
حال ہی میں اداکارہ ایمان علی نے نجی ٹی وی شو میں بطور مہمان شرکت کی جہاں انہوں نے مختلف موضوعات پر کھل کر اظہار خیال کیا۔
پروگرام کے دوران ایک سوال کے جواب میں ایمان علی کا کہنا تھا کہ خلیل الرحمٰن قمر کی ایک فلم کی شوٹنگ شروع ہونے سے محض تین دن قبل میں نے اس میں کام کرنے سے انکار کیا، مجھے کسی نے نکالا نہیں تھا۔
انہوں نے فلم کا نام لیے بغیر بتایا کہ مجھے ہدایت کار ندیم بیگ نے بھی منع نہیں کیا تھا بلکہ مجھے فلم کی کہانی سے اختلاف تھا جس وجہ سے میں نے شوٹنگ کے آغاز سے تین دن قبل کام سے انکار کیا۔
بعدازاں انہوں نے کہا کہ میں اس لکھاری (خلیل الرحمان قمر) کے لکھے ہوئے کسی بھی ڈرامے یا فلم میں کام نہیں کروں گی۔
ایک اور سوال کے جواب میں انہوں نے فرحان سعید کو سب سے پسندیدہ معاون اداکار قرار دیا اور ساتھ ہی ہمایوں سعید کی بھی تعریف کی۔
