کراچی: (دنیا نیوز) ٹیلی ویژن اور فلم نگری کے خوش قامت، خوبرُو اور باکمال اداکار اظہار قاضی کی 17 ویں برسی آج منائی جا رہی ہے۔
معروف اداکار اظہار قاضی ستمبر 1955 کو کراچی میں پیدا ہوئے، 1984 میں انہوں نے پی ٹی وی کی ڈرامہ سیریز کے کھیل ’تھکن‘ میں مختصر کردار نبھایا تھا، یہی ان کی فنی زندگی کا آغاز تھا۔
ممتاز ڈرامہ نگار فاطمہ ثریا بجیا نے اظہار قاضی کو دیکھتے ہی ڈرامہ سیریل ’انا‘ میں ہیرو کی آفر کر دی جس میں انہوں نے اتنی خوبصورت کردار نگاری کا مظاہرہ کیا جس پر پرستاروں نے انہیں پاکستانی امیتابھ کا خطاب دے دیا۔
اظہار قاضی نے اپنے فلمی کیریئر کا آغاز فلم ’روبی‘ میں مرکزی کردار کے طور پر کیا، اس فلم کو شائقین کی جانب سے بہت سراہا گیا۔
انہوں نے 85 سے زائد فلموں میں کام کیا جن میں ’منیلا کی بجلیاں‘، ’روپ کی رانی‘ اور ’چوروں کا بادشاہ‘ جیسی مشہور فلمیں شامل تھیں، ان کی سب سے مشہور فلمیں ’لو ان نیپال‘، ’عالمی جاسوس‘، ’خزانہ‘ اور ’سرکٹا انسان‘ تھیں۔
اظہار قاضی 23 دسمبر 2007 کو کراچی میں دل کا دورہ پڑنے سے انتقال کر گئے۔
