ممبئی: (ویب ڈیسک) بھارت کے مشہور فلم ساز شیام بینیگل 90 سال کی عمر میں انتقال کر گئے۔
رپورٹس کے مطابق وہ گردوں کے مسائل سے دوچار تھے اور ممبئی کے واک ہارٹ ہسپتال میں زیر علاج تھے، ان کی وفات کی خبر کی تصدیق ان کی بیٹی پیا بینیگل نے کی۔
شیام بینیگل نے پانچ دہائیوں پر محیط شاندار فلمی کیریئر میں کئی مشہور اور تنقیدی طور پر سراہی جانے والی فلمیں بنائیں، جن میں انکر، منتھن، زبیدہ، بھومیکا اور سرداری بیگم شامل ہیں، ان کی فلمیں زیادہ تر سماجی انصاف، خواتین کے حقوق اور دیہی ترقی جیسے موضوعات پر مبنی ہوتی تھیں۔
انہیں ہندوستانی پیریلل سنیما کا علمبردار سمجھا جاتا ہے، بینیگل کو ان کی خدمات کے اعتراف میں 18 نیشنل فلم ایوارڈز، 1976 میں پدم شری اور 1991 میں پدم بھوشن جیسے اعلیٰ اعزازات سے نوازا گیا۔
شیام بینیگل نے حال ہی میں 14 دسمبر کو اپنی 90 ویں سالگرہ منائی تھی جس میں دوستوں، مشہور اداکاروں اور فلم سازوں نے شرکت کی، ان کی سالگرہ کی تصاویر کو مشہور اداکار نصیر الدین شاہ نے سوشل میڈیا پر شیئر کیا تھا۔
ان کے انتقال کی خبر نے بھارتی فلم انڈسٹری میں صدمے کی لہر دوڑا دی، مداحوں اور سنیما سے محبت رکھنے والوں نے سوشل میڈیا پر ان کی شاندار خدمات اور یادگار فلموں کو خراج تحسین پیش کیا۔
شیام بینیگل کا نام ہمیشہ ہندوستانی سنیما کی تاریخ میں سنہرے الفاظ میں لکھا جائے گا، ان کی بنائی گئی فلمیں اور ان کے معاشرتی موضوعات پر مبنی انداز کہانیاں نسل در نسل فلم سازوں اور ناظرین کو متاثر کرتی رہیں گی۔
