لاہور: (ویب ڈیسک) اداکارہ و میزبان فضا علی نے رمضان ٹرانسمیشن میں عوام سے اپیل کی ہے کہ گانوں کی طرز پر بنائی گئی نعتوں کو فروغ نہ دیں۔
معروف میزبان فضا علی نے نعتوں میں گانوں کی دھنوں کی آمیزش اور طرز پر کڑی تنقید کرتے ہوئے کہا کہ نعتوں کے تقدس کا ہر حال میں خیال رکھنا چاہیے، گانوں کی دھن اور طرز پر بنی نعتیں سن کر ذہن گانوں کی جانب راغب ہوجاتا ہے۔
انہوں نے کہا ہے کہ اللہ کی حمد و ثنا اور محمدﷺ کی مدحت کیلئے گانوں کے طرز کا استعمال افسوسناک ہے، گانوں کی شاعری بہت نامناسب ہوتی ہے، ان گانوں کی دھنوں اور طرز کو نعت میں استعمال کرنا بہت عجیب بات ہے۔
فضا علی نے مزید کہا ہے کہ میں سب ہی ٹی وی چینلز اور سوشل میڈیا پلیٹ فامرز سے اپیل کرتی ہوں کہ گانوں کی دھنوں پر بننے والی نعتوں کو فروغ نہ دیں، وہ وقت بھی تھا جب نعتیں روحانی بالیدگی کا باعث بنتی تھیں۔
