ممبئی: (ویب ڈیسک) بھارتی اداکار نے آسٹریلوی ٹیم کے سابق پلیئر اور اداکاری کی دنیا میں قدم رکھنے والے ڈیوڈ وارنر کو اپنے بیٹے جیسا قرار دے دیا۔
ساؤتھ فلموں کے سینئر اداکار 68 سالہ راجندر پرساد نے فلم رابن ہڈ میں ڈیوڈ وانر کی توہین کرنے کے بعد آنے والے ردعمل پر معذرت کرلی ہے۔
رابن ہڈ کی پری ریلیز ایونٹ پر راجندر ناتھ کے خود سے 30 سال چھوٹے ڈیوڈ وارنر پر کیے گئے تبصرے کو انٹرنیٹ صارفین نے توہین آمیز قرار دیا تو اداکار نے معذرت کرلی۔
سینئر اداکار نے ایک ویڈیو پیغام میں آسٹریلوی کھلاڑی سے متعلق اپنے تبصرے پر وضاحت بھی پیش کی اور کہا کہ میں نے ڈیوڈ وارنر سے متعلق جو کچھ بھی کہا وہ غیر ارادی تھا، ایونٹ کے دوران ہم سب آپس میں ہنسی مذاق کررہے تھے، میں نے وارنر سے کہہ دیا ہے کہ وہ تو میرے بچوں جیسا ہے۔
انہوں نے مزید کہا کہ میں اور وارنر ایونٹ سے قبل ایک دوسرے کے شعبوں پر مذاق کررہے تھے، اُس نے مجھے گلے لگایا تو میں نے کہا خود کو اداکار کے طور پر ثابت کرے تو اس نے جواباً کہا تم خود کو کرکٹر کے طور پر ثابت کرو۔
راجندر پرساد نے یہ بھی کہا کہ میں ڈیوڈوارنر سے محبت کرتا ہوں، مجھے اس کی کرکٹ پسند ہے اور اُسے ہماری فلمیں اور اداکاری مزہ دیتی ہیں، اگر میری حرکت سے کسی کو تکلیف پہنچی ہو تو معذرت چاہتا ہوں اور یقین دلاتا ہوں کہ ایسا دوبارہ نہیں ہوگا۔
