ممبئی: (ویب ڈیسک) بھارت کے معروف پنجابی گلوکار ہرمن سدھو ٹریفک حادثے میں جان کی بازی ہار گئے۔
غیر ملکی میڈیا کے مطابق پنجاب کے ضلع مانسا میں جمعہ کی شام مشہور بھارتی پنجابی گلوکار ہرمن سدھو کی کار کو حادثہ پیش آیا، ہرمن سدھو اپنے گاؤں واپس جا رہے تھے کہ مانسا، پٹیالہ روڈ پر ایک پیلس کے قریب ان کی کار سامنے سے آنے والے ٹرک سے ٹکرا گئی۔
گلوکار کی کار کی ٹکر اتنی شدید تھی کہ گاڑی مکمل طور پر تباہ ہوگئی اور وہ لاکھوں مداحوں کو الوداع کہتے ہوئے موقع پر ہی دم توڑ گئے، ہرمن کی عمر 37 سال تھی جنہوں ’پیپر جا پیار‘ گانے سے شہرت حاصل کی تھی، ان کی آواز اور سادگی نے انہیں مقامی سطح پر بے حد مقبول بنایا۔
ہرمن سدھو کی اچانک موت نے پوری بھارتی شوبز انڈسٹری سمیت ان کے لاکھوں مداحوں کو سوگوار کر دیا ہے، ان کے مقبول گانوں میں ’کوئی چکر نئیں‘، ’بیبے باپو‘، ’ببّر شیر‘، ’ملتان بمقابلہ رشیا‘ شامل ہیں۔
