لاہور: (دنیا نیوز) پاکستان ہاکی ٹیم کے منیجر انجم سعید پرو ہاکی لیگ سے وطن واپسی پر مبینہ طور پر جہاز میں سگریٹ نوشی کرتے ہوئے پکڑے گئے۔
ذرائع کے مطابق ارجنٹینا سے وطن واپسی پر ٹرانزٹ کے لیے جہاز ایک دوسرے ایئرپورٹ پر رُکا۔
اس معاملے پر ذرائع کا کہنا ہے کہ بتایا گیا کہ جہاز واپسی پر برازیل میں ٹرانزٹ کے لیے رُکا تو جہاز رُکنے پر انجم سعید نے مبینہ طور پر سگریٹ نوشی کی۔
ذرائع کے مطابق جہاز کے عملے نے سگریٹ نوشی پر شکایت کی تو سکیورٹی عملے نے انجم سعید کو آف لوڈ کردیا، بعدازاں منیجر انجم سعید اور ایک کھلاڑی کے علاوہ باقی تمام سکواڈ وطن واپس روانہ ہو گیا۔
ذرائع کا کہنا ہے کہ انجم سعید کے معاملے پر پورے سکواڈ نے خوب منت سماجت کی لیکن سکیورٹی کے عملے نے ایک نہ سنی اور سگریٹ نوشی کے حوالے سے سخت قوانین لاگو کیے اور انہیں آف لوڈ کردیا۔
واضح رہے کہ قومی سکواڈ 2 روز قبل وطن واپس پہنچ چکا ہے جبکہ انجم سعید اور ایک کھلاڑی گزشتہ شب وطن واپس آگئے ہیں۔
ذرائع کا کہنا ہے کہ سکیورٹی اہلکاروں نے انہیں اپنی تحویل میں لیا اور جرمانہ بھی کیا، اثرو رسوخ استعمال بھی کیا گیا تاہم معاملہ جرمانے پر ختم ہوا۔
انجم سعید کا ردعمل
دوسری جانب انجم سعید نے اس واقعے کی تردید کی ہے، ان کا کہنا ہے کہ ایسا کوئی واقعہ پیش نہیں آیا، میں ایک کھلاڑی کے ساتھ واپسی پر دبئی میں کام کے سلسلے میں رُکا تھا۔
