لاہور: (دنیا نیوز) صوبائی دارالحکومت لاہور سمیت پنجاب بھر میں وائرل بیماریوں کے پھیلنے کا خدشہ پیدا ہو گیا، ڈائریکٹوریٹ جنرل آف ہیلتھ سروسز پنجاب نے مہلک بیماریوں کے پھیلاؤ سے متعلق مراسلہ جاری کر دیا ۔
مراسلہ میں کہا گیا ہے کہ حالیہ دنوں میں ڈینگی، نمونیا ،انفلوئنزا، خسرہ ، کالی کھانسی اور نیگلیریا کے مریض رپورٹ ہو سکتے ہیں ، لاہور سمیت پنجاب بھر کے تمام ہسپتالوں کو ہائی الرٹ کر دیا گیا ہے ، بیماریوں کے علاج معالجے کے حوالے سے تمام ضروری اقدامات کیے جائیں۔
محکمہ صحت کی جانب سے جاری مراسلہ میں مزید کہا گیا ہے کہ ہسپتالوں میں آگاہی بینرز اور کاؤنٹرز بنائے جائیں، تمام ضروری ادویات ہسپتالوں میں موجود ہونی چاہئیں، ہسپتالوں میں آنے والے تمام مریضوں کو بہترین طبی سہولیات فراہم کی جائیں۔
ڈائریکٹر سی ڈی سی ڈاکٹر یداللہ نے کہا ہے کہ حالیہ دنوں میں 8 بیماریوں کے پھیلنے سے پہلے روک تھام ضروری ہے، لاہور سمیت پنجاب بھر میں ہر سال انہی بیماریوں سے بہت سےلوگ متاثر ہوتے ہیں، بیماریوں کی روک تھام کیلئے آگاہی بہت ضروری ہے، لاہور سمیت پنجاب بھر کے تمام انتظامی افسران کو اقدامات کرنے کی ہدایت کر دی گئی ہے۔
