ریاض: (دنیا نیوز) وزیراعظم عمران خان نے کہا ہے کہ ہم نے مسئلہ کشمیر کو پوری دنیا میں اجاگر کرنا ہے، میں سعودی قیادت کو کشمیر کی صورتحال سے آگاہ کرنا چاہتا ہوں۔
وزیراعظم عمران خان سے سعودی عرب میں مقیم ممتاز پاکستانیوں نے ملاقات کی۔ اس موقع پر ان کا کہنا تھا کہ سعودی عرب نے ہر مشکل وقت میں ہماری مدد کی۔ کشمیر میں ہمارے بھائی مشکل صورتحال سے گزر رہے ہیں۔ میں سعودی قیادت کو کشمیر کی صورتحال سے آگاہ کرنا چاہتا ہوں۔
ان کا کہنا تھا کہ کشمیر ایک بین الاقوامی مسئلہ بن گیا ہے۔ پوری دنیا ہمارے بیانیے کو تسلیم کر رہی ہے۔ او آئی سی نے کشمیر کے مسئلے پر ہماری حمایت کی ہے۔ یو این میں بھی کشمیر کا مسئلہ بھرپور انداز میں اٹھائیں گے۔
انہوں نے سعودی عرب میں مقیم پاکستانیوں کو بتایا کہ ہمیں قرضوں کے بوجھ میں ڈوبی معیشت ورثے میں ملی تھی، اب ہر شعبے میں اصلاحات لا رہے ہیں۔ سرمایہ کاری کو فروغ دینا اولین ترجیح ہے۔ بیرون ملک پاکستانیوں کے لیے قانونی اصلاحات لا رہے ہیں۔ ہماری حکومت کاروبار میں آسانیاں پیدا کر رہی ہے۔
