کوئٹہ:(دنیا نیوز) بلوچستان میں طوفانی بارشوں اور سیلاب سے 65 افراد جاں بحق ہوئے جبکہ 730 مکانات کو نقصان پہنچا۔
پی ڈی ایم اے بلوچستان کی جانب سے پری مون سون اور مون سون کی حالیہ بارشوں کے حوالے سے نقصانات کی رپورٹ جاری کر دی گئی ہے، جسکے مطابق یکم جون سے اب تک بلوچستان میں بارشوں سے 65 افراد جاں بحق ہوئے جن میں 19مرد، 24 خواتین اور 22 بچے شامل ہیں، بارشوں کے باعث مختلف حادثات میں 49 افراد زخمی ہوئے۔
رپورٹ کے مطابق طوفانی بارشوں اور سیلابی صورتحال سے 730 مکانات کو نقصان پہنچا، جن میں 512 مکانات جزوی اور 218 مکانات مکمل طور پرمنہدم ہوگئے، مون سون کی بارشوں سے بلوچستان کے علاقے کوئٹہ، ژوب، پشین، کوہلو، کیچ، لورالائی اور قلعہ سیف اللہ زیادہ متاثر ہوئے۔
