اسلام آباد:(دنیا نیوز) وزیراعظم شہباز شریف نے بارشوں اور سیلاب سے جاں بحق ہونے والوں کے اہل خانہ کیلئے فی کس 10 لاکھ امداد کا اعلان کردیا۔
وزیراعظم شہباز شریف نے خیبرپختونخوا اور بلوچستان میں سیلاب کی صورتحال پر اعلیٰ سطح کے اجلاس کی صدارت کی، اجلاس میں انہوں نے کہا کہ این ڈی ایم اے اور صوبائی ڈیزاسٹر مینجمنٹ حکام کے مشترکہ سروے کے بعد حالیہ بارشوں اور سیلاب میں جاں بحق ہونے والے افراد کے لواحقین کو وفاقی حکومت 10 لاکھ روپے فی کس معاوضہ ادا کرے گی، نقصانات کا جائزہ لینے اور سیلاب متاثرین سے اظہار یکجہتی کیلئے جلد بلوچستان کا دورہ کروں گا،
ان کا کہنا تھا کہ قائم مقام چیئرمین این ڈی ایم اے فوری طور پر کوئٹہ پہنچیں گے اور سیلاب متاثرین کی امداد اور بحالی کیلئے بلوچستان حکومت کے ساتھ مل کر کام کریں گے، وفاقی اور صوبائی حکومتوں کے درمیان مربوط کوششوں کی ضرورت ہے، خوشامد کی کوئی گنجائش نہیں، این ڈی ایم اے بلوچستان اور خیبرپختونخوا کے سیلاب سے متاثرہ علاقوں میں اپنی موجودگی بڑھائے گی۔
شہباز شریف نے کہا کہ ﷲ کا شکر ہے کہ تمام آبی ذخائر محفوظ ہیں اور صورتحال پر 24 گھنٹے نظر رکھی جا رہی ہے۔
وزیراعظم نے ہدایت کی کہ آئندہ دنوں میں مون سون کی مزید بارشوں کے پیش نظر تمام وفاقی اور صوبائی حکومتوں کے محکمے ہائی الرٹ رہیں، طوفانی بارشوں اور سیلاب کے نتیجہ میں قیمتی انسانی جانوں کے ضیاع پر پوری قوم غمزدہ ہے، ہم دکھ کی اس گھڑی میں سوگوار خاندانوں کے ساتھ ہیں، بلوچستان اور کے پی کے کی حکومتوں نے اب تک اچھا کام کیا ہے لیکن مزید کام کرنے کی ضرورت ہے، وفاقی حکومت انہیں ہر ممکنہ تعاون فراہم کرے گی۔
