لاہور: (دنیا نیوز) چیف الیکشن کمشنر سکندر سلطان راجہ کی وزیر اعلیٰ آفس آمد ہوئی، نگران وزیر اعلیٰ پنجاب محسن رضا نقوی نے ان کا خیر مقدم کیا۔
نگران وزیر اعلیٰ پنجاب محسن نقوی اور چیف الیکشن کمشنر سکندر سلطان راجہ کی زیر صدارت اعلیٰ سطح کا اجلاس ہوا، جس میں الیکشن کمیشن کے ممبر سندھ نثار احمد درانی، ممبر بلوچستان شاہ محمد جتوئی، ممبر کے پی کے جسٹس (ر) اکرام اللہ خان، ممبر پنجاب بابر حسن بھروانہ، سیکرٹری الیکشن کمیشن عمر حمید خان، سپیشل سیکرٹری الیکشن کمیشن ظفر اقبال حسین، صوبائی الیکشن کمشنر پنجاب سعید گل نے شرکت کی۔
چیف سیکرٹری پنجاب، انسپکٹر جنرل پولیس، ایڈیشنل چیف سیکرٹری، ایڈیشنل آئی جی سپیشل برانچ، ایڈیشنل چیف سیکرٹری داخلہ، سیکرٹری قانون، سیکرٹری پراسیکیوشن، سی سی پی او لاہور اور ایڈیشنل آئی جی سی ٹی ڈی بھی اہم اجلاس میں موجود تھے۔
یہ بھی پڑھیں: پنجاب حکومت کی ڈیڈ لائن ختم، زمان پارک جانیوالے تمام راستے بند، پولیس الرٹ
اجلاس میں 9 مئی کے پرتشدد واقعات کی شدید الفاظ میں مذمت اور پاک فوج کے ساتھ مکمل یکجہتی کا اظہار کیا گیا، چیف الیکشن کمشنر اور ممبران کو 9 مئی کے دہشت گردی کے واقعات میں تحریک انصاف کے ملوث ہونے کے ٹھوس شواہد پیش کئے گئے، اجلاس میں چیف الیکشن کمشنر اور ممبران کو تصاویر، ویڈیوز اور میسیجنگ کے ثبوت بھی دکھائے گئے۔
انسپکٹر جنرل پولیس ڈاکٹر عثمان انور نے 9 مئی کو جناح ہاؤس اور دیگر عسکری تنصیبات پر حملوں کی تفصیلات سے چیف الیکشن کمشنر اور ممبران کو آگاہ کیا، ایڈیشنل چیف سیکرٹری داخلہ نے دہشت گردوں کے حملوں سے ہونے والے نقصانات کے بارے میں بریفنگ دی۔
اجلاس کو بتایا گیا کہ مجموعی طور پر 3 روز میں 256 تشدد کے واقعات ہوئے، فوجی تنصیبات اور مقامات کو خصوصی طور پر نشانہ بنایا گیا، شرپسندوں نے پولیس سمیت دیگر اداروں کی 108 گاڑیوں اور 23 عمارتوں کو نقصان پہنچایا، پرتشدد واقعات میں 5 افراد جاں بحق ہوئے جبکہ 127 پولیس افسران و جوان اور 15شہری زخمی ہوئے۔
یہ بھی پڑھیں: بدمعاشوں اور مجرموں کا گروہ قوم پر حاوی ہو چکا ہے: عمران خان
اس موقع پر نگران وزیر اعلیٰ نے کہا کہ 9 مئی کو سیاسی جماعت نے پوری پاکستانی قوم کو شرم سار کیا، عسکری تنصیبات پر حملے باقاعدہ منصوبہ بندی کے تحت کئے گئے، جیو فینسنگ کے ذریعے حملہ آوروں اور زمان پارک میں موجود سیاسی لیڈرشپ کے درمیان رابطوں کے ثبوت سامنے آئے ہیں، سیاست کی آڑ میں گھناؤنا کھیل کھیلا گیا اور ابتدائی تخمینے کے مطابق 600 کروڑ روپے کا نقصان ہوا۔
اجلاس کے دوران چیف الیکشن کمشنر سکندر سلطان راجہ نے کہا ہے کہ نگران وزیر اعلیٰ محسن نقوی کی قیادت میں پنجاب حکومت نے موجودہ صورتحال کے تناظر میں عوام کے تحفظ کیلئے بہترین اور جرأت مندانہ اقدامات کئے ہیں، پنجاب حکومت کی ٹیم سے مطمئن ہوں کہ وہ اپنے فرائض ایمانداری سے ادا کر رہی ہے، آپ کو کسی بھی دباؤ میں آنے کی ضرورت نہیں، ہم آپ کے ساتھ ہیں۔
چیف الیکشن کمشنر نے کہا کہ الیکشن کمیشن کا مقصد آزادانہ، منصفانہ اور پرامن عام انتخابات کرانا ہے، عام انتخابات کیلئے سکیورٹی اقدامات کا دوبارہ جائزہ لیں گے، ہمارا کسی سیاسی جماعت سے تعلق نہیں اور نہ کوئی سیاسی مقصد ہے، ہمیشہ میرٹ پر فیصلے کئے، نگران حکومت بھی غیر جانبدار ہے اور فری اینڈ فیئر الیکشن اس کا مینڈیٹ ہے، پنجاب حکومت کو فری اینڈ فیئر الیکشن کیلئے ہرممکن سپورٹ کریں گے۔
