ساہیوال: (دنیا نیوز) جے یو آئی (ف) کے سربراہ مولانا فضل الرحمان نے کہا کہ ملک میں موجودہ دہشت گردی سے دنیا میں پیغام جائے گا پاکستان پرامن ملک نہیں ہے۔
جے یو آئی (ف) کے سربراہ مولانا فضل الرحمان نے جامعہ علومیہ میں میڈیا سے گفتگو کرتے ہوئے کہا کہ انتخابات جنوری کے آخر میں ہونے کا جو کہا جا رہا ہے اس میں کے پی کے میں انتخابات ہونا مشکل ہوں گے، پی ٹی آئی کے مسائل ابھی عدالت میں ہیں، جو بھی ملک میں اس وقت صورتحال ہے اسکی ذمہ دار پی ٹی آئی اور چیئرمین پی ٹی آئی ہیں۔
مولانا فضل الرحمان نے کہا زر مبادلہ کے ذخائر 2 ارب پر لانے والے پی ٹی آئی والے ہیں، معاشی لحاظ سے ملک کو دلدل میں گرانے والی بھی پی ٹی آئی ہے، ڈیڑھ سال میں ہماری پی ڈی ایم کی گورنمنٹ نے زرمبادلہ کے ذخائر کو گیارہ ارب تک پہنچایا، انتخابات اس وقت ضروری نہیں بلکہ ملک کی معیشت بہتر ہونا ضروری ہے، ہم ہر وقت الیکشن کے لئے تیار ہیں۔
جے یو آئی کے سربراہ نے کہا ساڑھے تین سال الیکشن کے لئے ہی جدوجہد کی ہے، کسی نے بھی میرے کہنے سے نااہل نہیں ہونا، چیئرمین پی ٹی آئی نے اپنے کاموں سے ثابت کیا کہ وہ نااہل ہے، نواز شریف کے دوستوں سے جب بھی پوچھا انہوں نے کہا کہ وہ آئیں گے، پی ڈی ایم اتحاد اب غیر فعال ہے اس لیے نوازشریف کے ویلکم کی ترتیب وہی بنائیں گے۔
فضل الرحمان نے مزید کہا موجودہ دہشت گردی سے دنیا میں پیغام جائے گا کہ پاکستان پرامن ملک نہیں، میں سمجھتا ہوں نگران حکومت والا فلسفہ ہی غلط ہے، میں نگران حکومت کو کچھ نہیں سمجھتا اس میں نگران کوئی اور ہوتا ہے۔
