لندن:(دنیا نیوز) صدر پاکستان مسلم لیگ ن میاں نوازشریف نے کہا ہے کہ اگر میری حکومت نہ گرائی جاتی تو پاکستان آج ایشین ٹائیگر ہوتا۔
لندن میں مریم نواز کے ہمراہ مسلم لیگ ن کے ورکرز کنونشن سے خطاب کرتے ہوئے سابق وزیراعظم نواز شریف کا کہنا تھا کہ پاکستان ترقی کی راہ پر گامزن ہے اور حالات بہتر ہورہے ہیں، ہم اب یہ کرکے دکھائیں گے۔
انہوں نے کہاکہ کچھ لوگوں نے ذاتی مفاد کے لیے میری حکومت گرائی، اور مجھے ساری زندگی کے لیے سیاست سے نااہل کیا گیا، جس کا نقصان ملک کو ہوا، مسلم لیگ ن جب بھی اقتدار میں آئی ملک نے ترقی کی، ہمارے خلاف سازش نہ کی جاتی تو پاکستان آج جی 20 میں بھی شامل ہوچکا ہوتا۔
میاں نوازشریف کا کہنا تھا کہ اب ایک بار پھر پاکستان ترقی کی راہ پر گامزن ہے، اور شہباز شریف ملک کی حالت بدلنے کے لیے دن رات کوشش کررہے ہیں، شرح سود کم ہونے کے ساتھ ترقی کی رفتار بھی پہلے سے بہتر ہے، اس کے علاوہ مہنگائی کی کمر ٹوٹنے کے ساتھ ساتھ زرمبادلہ کے ذخائر بہتر ہورہے ہیں۔
سابق وزیر اعظم نے مزید کہا کہ مسلم لیگ ن کے کارکنان متحد و منظم ہیں اور ان کی پارٹی کے لیے خدمات قابل تعریف ہیں۔
خیال رہے صدر مسلم لیگ ن نواز شریف کے ساتھ ورکرز کنونشن میں وزیر دفاع خواجہ آصف اور مقامی رہنما بھی موجود تھے۔
