پیرس: (ویب ڈیسک)پاکستان کی جانب سے 12 ممالک کے اعزاز میں یونیسکو ہیڈ کوارٹر میں نوروز کے ثقافتی تہوار کے جشن کا اہتمام کیا گیا۔
اس تقریب میں سفارت کاروں، معززین اور کمیونٹی کے اراکین نے شرکت کی ، جشن کی تقریبات میں روایتی موسیقی اور پرفارمنس پیش کی گئی، ثقافتی اور روایتی کھانوں کے سٹال بھی توجہ کا مرکز بنے رہے۔
مہمانوں کی تواضع روایتی پاکستانی کھانوں سے کی گئی، جس میں شامی کباب، خوشبودار بریانی اور تازگی بخش لسی و دیگر کھانے شامل تھے، جس میں یونیسکو میں پاکستان کے لذیذ پکوان کے ورثے کی ایک جھلک پیش کی گئی۔
نوروز موسم بہار کی آمد کا تہوار، دنیا بھر میں امن، دوستی اور تجدید کی علامت ہے، اسے یونیسکو نے غیر محسوس ثقافتی ورثہ (ICH) کے طور پر تسلیم کیا ہے اور اسے پاکستان نے بارہ (12) دیگر ممالک کے ساتھ مشترکہ طور پر رجسٹر کیا ہے۔
یونیسکو میں منعقدہ تقریب نے نہ صرف ثقافتی تنوع کی اہمیت کو اجاگر کیا بلکہ کھانے اور موسیقی کے حوالے سے ممالک کے درمیان اتحاد کے جذبے کو بھی تقویت دی۔
