لاہور: (دنیا نیوز) وزیراعلیٰ پنجاب مریم نواز شریف نے کھیلوں کے فروغ کیلئے تمام ممکنہ وسائل مہیا کرنے کا عزم ظاہر کیا ہے۔
کھیلوں کے عالمی دن پر اپنے پیغام میں وزیر اعلیٰ پنجاب مریم نواز کا کہنا تھا کہ کھیل اور امن کا عالمی دن منانے کا مقصد معاشرے میں کھیلوں کے مثبت کردار کو اُجاگر کرتا ہے، سپورٹس ایونٹس معاشرے میں امن اور ترقی کی راہ ہموار کرتے ہیں، امن اور کھیل لازم و ملزوم ہیں، امن ہوگا تو کھیل ہوں گے۔
انہوں نے کہا ہے کہ کھیل نوجوانوں میں ٹیم ورک، مسابقت اور برداشت پیدا کرنے میں اہم کردار ادا کرتا ہے، پنجاب میں کھیلوں کے فروغ کے لئے کھیلتا پنجاب پروگرام شروع کیا گیا ہے۔
ان کا کہنا تھا کہ پنجاب میں پنک گیمز امن اور مساوی ترقی کا استعارہ ہیں، حکومت کھیلوں کے فروغ کے لئے گراؤنڈ اور جمنیزیم بنا رہی ہے، پنجاب میں 300 گراؤنڈ اور سپورٹس کمپلیکس بنانے کیلئے اقدامات کئے جا رہے ہیں۔
مریم نواز نے مزید کہا کہ نوجوانوں، معمر افراد، معذور افراد اور دیگر پسماندہ علاقوں کے ہر نوجوان کو سپورٹس کے مساوی مواقع مہیا کئے جا رہے ہیں، کھیل کیلئے تمام ممکنہ وسائل مہیا کئے جائیں گے اور سپورٹس انڈوومنٹ فنڈز کو مزید بڑھائیں گے۔
