لاہور: (دنیا نیوز) وزیر اطلاعات پنجاب عظمیٰ بخاری نے کہا ہے کہ مریم نواز نے جنگ کے دنوں میں سب سے متحرک وزیراعلیٰ کا رول ادا کیا۔
بیرسٹر سیف کے بیان پر اپنا ردعمل دیتے ہوئے صوبائی وزیر اطلاعات عظمیٰ بخاری نے کہا کہ کہنے کو آپ وزیر اطلاعات ہیں لیکن آپ کے پاس اطلاعات ہوتی ہیں نہ معلومات، آپ کو بنا بنایا بیان دیا جاتا ہے وہ آپ میڈیا کو سرکولیٹ کر دیتے ہیں۔
عظمیٰ بخاری نے کہا کہ مریم نواز نے اپنی تقریروں سے اپنی پاک افواج کا مورال بڑھایا، جب ڈرونز گر رہے تھے مریم نواز نے پنجاب کی سول انتظامیہ کو متحرک رکھا، علی امین گنڈاپور جنگ کے دنوں میں اڈیالہ جیل کے چکر کاٹتے رہے، بدتمیزی کرتے رہے۔
یہ بھی پڑھیں: نفرت کی سیاست نے کچھ نہیں دیا، ہمیں ملک کی خاطر ذاتی انا قربان کرنا ہوگی: مریم نواز
صوبائی وزیر اطلاعات نے کہا کہ بانی پی ٹی آئی کا بھی جنگ کے دوران کوئی بیان نہیں آیا، جنگ کے دن علیمہ خان اس کو نورا کشتی قرار دے رہی تھیں، علیمہ خان نے جنگ کو ملی بھگت کہا تھا، پوری تحریک انصاف جنگ کے دوران منظر عام سے غائب رہی۔
عظمیٰ بخاری نے کہا کہ تحریک انصاف کا سوشل میڈیا اپنے ہی ملک اور فوج کے خلاف مہم جوئی میں مصروف رہا، آپ لوگوں میں رتی برابر شرم و حیا نہیں رہی، جب جب قوم متحد ہوتی تحریک انصاف دشمن کی صفوں میں کھڑی نظر آتی ہے۔
انہوں نے کہا کہ عظمیٰ بخاری اس جنگ نے بہت سارے چہروں کو بے نقاب کر دیا ہے، پوری قوم اپنی بہادر افواج کے شانہ بشانہ کھڑی تھی، دوسری طرف تحریک انصاف کا گالم گلوچ بریگیڈ حسب روایت قوم میں انتشار،جھوٹ اور افراتفری پھیلانے میں مصروف رہا۔
صوبائی وزیر اطلاعات کا کہنا تھا کہ قوم اب جان چکی ہے تحریک انصاف کن کا پراجیکٹ تھا اور انکی وفاداریاں کس ملک کے ساتھ ہیں۔
