لاہور: (دنیا نیوز) وزیراعلیٰ پنجاب مریم نواز شریف کے ویژن کے تحت پنجاب حکومت نے لاہور کو سموگ اور ماحولیاتی آلودگی سے نجات دلانے کیلئے ایک انقلابی منصوبہ ’’لنگز آف لاہور‘‘ شروع کر دیا۔
منصوبے کا مقصد لاہور کے اردگرد ایک جنگل نما حد بندی قائم کرنا ہے جو نہ صرف فضائی آلودگی میں کمی لائے گی بلکہ شہری پھیلاؤ کو بھی روکنے میں مددگار ثابت ہوگی۔
محکمہ ہاؤسنگ کے ترجمان کے مطابق اس منصوبے کے تحت 48 لاکھ سے زائد درخت لگائے جائیں گے، جبکہ لاہور کی جنگل نما حد بندی کی کل لمبائی 112 کلومیٹر اور رقبہ 1711 ایکڑ پر محیط ہوگا، منصوبہ تین مراحل میں مکمل کیا جائے گا۔
ترجمان کا کہنا ہے کہ پہلے مرحلے میں 1210 ایکڑ اراضی پر 59 کلومیٹر طویل رنگ فاریسٹ بنایا جائے گا، جبکہ دوسرے مرحلے میں 31 اور تیسرے مرحلے میں 22 کلومیٹر طویل جنگلات لگائے جائیں گے، پہلا مرحلہ ایک سال کے اندر مکمل کر لیا جائے گا۔
منصوبے کی تکمیل کے بعد تقریباً 2 کروڑ شہری اس سے مستفید ہوں گے، اس منصوبے کی ذمہ داری پی ایچ اے لاہور کو سونپی گئی ہے جو اسے جدید ترین ماحول دوست اصولوں کے تحت مکمل کرے گا۔
ترجمان محکمہ ہاؤسنگ نے کہا کہ یہ منصوبہ وزیر اعلیٰ پنجاب مریم نواز شریف کے ویژن کے عین مطابق ہے جو سموگ کے تدارک اور لاہور کے ماحول کو دوبارہ سرسبز و شاداب بنانے کے لئے ایک منفرد قدم ہے۔
سینئر وزیر پنجاب مریم اورنگزیب بھی سموگ اور ماحولیاتی آلودگی کے خاتمے کیلئے بھرپور انداز میں متحرک ہیں، حکومت پنجاب کی ہدایت کے مطابق منصوبے کی تکمیل کو جلد از جلد یقینی بنایا جائے گا تاکہ لاہور ایک بار پھر “باغوں کا شہر” بن سکے۔
