یونیورسٹی آف لیسٹر برطانیہ کے وفد کا ’دنیا نیوز‘کا دورہ، خبروں کی بروقت کوریج کو سراہا

لاہور:(دنیا نیوز) یونیورسٹی آف لیسٹر برطانیہ کے وفد نے ’دنیا نیوز‘ ہیڈ آفس کا دورہ کیا، مہمانوں نے بروقت کوریج کو سراہا۔

پرو وائس چانسلر یونیورسٹی آف لیسٹر برطانیہ کے پروفیسر ڈاکٹر ڈینئل لیڈلی اور ڈین آف انٹرنیشنلائزیشن یونیورسٹی آف لیسٹر برطانیہ کے ڈاکٹر عبدالجبار نے دنیا نیوز کے ہیڈ آفس لاہور کا دورہ کیا جہاں دنیا میڈیا گروپ کی مینجمنٹ نے وفد کو خوش آمدید کہا۔

مہمان وفد نے جدید ٹیکنالوجی سے آراستہ ’دنیا نیوز‘ کے سٹوڈیو سمیت نیوز روم اور دیگر شعبہ جات دیکھے اور خبروں کی بروقت کوریج کو سراہا۔

ڈین آف انٹرنیشنلائزیشن یونیورسٹی آف لیسٹر برطانیہ ڈاکٹر عبدالجبار کا کہنا تھا کہ دنیا نیوز کا دورہ کر کے بہت اچھا لگا، مختلف شعبہ جات میں جدید ٹیکنالوجی کا استعمال متاثر کن ہے۔

دوسری جانب طلبہ کے لیے بڑی خبر سامنے آئی ہے ، یونیورسٹی آف سینٹرل پنجاب اور یونیورسٹی آف لیسٹر برطانیہ کے درمیان تعلیمی شراکت داری کا آغاز ہوگیا،،یونیورسٹی آف سینٹرل پنجاب اور یونیورسٹی آف لیسٹر برطانیہ کے درمیان شراکت داری نے معیاری تعلیم کے خواہشمند طلبا کیلئے نئے مواقع پیدا کردیے۔

اب طلبہ اپنی ڈگری کے ابتدائی دو سال یونیورسٹی آف سینٹرل پنجاب میں مکمل کریں گے، جب کہ آخری دو سال یونیورسٹی آف لیسٹر برطانیہ میں تعلیم حاصل کریں گے، طلبہ بیچلر آف سائنس کی ڈگریاں اکنامکس اینڈ ڈیٹا اینالیٹکس اور اکاؤنٹنگ اینڈ فنانس میں حاصل کر سکیں گے، ان کی حتمی ڈگری اور ایکریڈیٹیشن یونیورسٹی آف لیسٹر برطانیہ کی جانب سے دی جائے گی۔

پرو وائس چانسلر یونیورسٹی آف لیسٹر برطانیہ پروفیسر ڈاکٹر ڈینئل لیڈلی کا کہنا تھا کہ یہ ان کا پہلا دورہ پاکستان ہے، لاہور میں لوگوں سے مل کر بہت اچھا لگا، ان کا کہنا تھا کہ یونیورسٹی آف سینٹرل پنجاب اور یونیورسٹی آف لیسٹر برطانیہ کے درمیان شراکت داری سے طلبہ کو برطانیہ میں تعلیم حاصل کرنے کا موقع ملے گا، دونوں ممالک میں تعلیم کے شعبے میں بہترین سہولیات میسر ہیں۔

ڈاکٹر ڈینئل لیڈلی اور ڈاکٹر عبدالجبار نے بتایا کہ یونیورسٹی آف سینٹرل پنجاب اور یونیورسٹی آف لیسٹر برطانیہ کے درمیان شراکت داری نوجوانوں کو عالمی سطح پر مؤثر کردار ادا کرنے کیلئے تیار کرے گی اور اس نوعیت کی بین الاقوامی شراکت داریوں کے ذریعے نوجوانوں کو عالمی تجربہ اور اعتماد فراہم کیا جائے گا تاکہ وہ ایک باہم مربوط دنیا میں قیادت کر سکیں۔