لاہور: (دنیا نیوز) ملک کے مختلف علاقوں میں دھند کا راج رہا، حد نگاہ بہتر ہونے پر بند موٹر ویز کو کھول دیا گیا۔
ترجمان موٹر ویز پولیس کے مطابق موٹر وے ایم ون پشاور سے رشکئی، ایم 2 لاہور سے بالکسر تک بند کر دی گئی ہے، جبکہ موٹر وے ایم 3 لاہور سے ملتان تک ٹریفک کیلئے بند ہے۔
ایم 4 پنڈی بھٹیاں سے ملتان تک جبکہ ایم 5 ملتان سے سکھر اور ایم 11 لاہور سے سیالکوٹ تک بند کر دی گئی ہے۔
اسی طرح قومی شاہراہوں پر بہاولپور، احمد پور شرقیہ، ترنڈہ محمد پناہ، اقبال آباد، رحیم یار خان، داؤدخیل اور صادق آباد میں دھند ہے، قومی شاہراہوں پر حد نگاہ 0 سے 100 میٹر تک ہے۔
ترجمان موٹر وے پولیس سید عمران احمد کا کہنا ہے کہ موٹرویز کی بندش کا مقصد عوام کی جان و مال کا تحفظ ہے، دھند میں لین کی خلاف ورزی خطرناک حادثات کا باعث ہو سکتی ہے، روڈ یوزرز لین ڈسپلن پر سختی سے عمل کریں، شہری دن کے اوقات میں سفر کو ترجیح دیں، دھند میں صبح 10 تا شام 6 تک محفوظ سفری اوقات ہیں۔
انہوں نے کہا کہ دھند میں ڈرائیور حضرات فوگ لائٹس لازمی استعمال کریں، غیر ضروری سفر سے اجتناب کریں، تیز رفتاری سے بچیں ، آگے والی گاڑی سے محفوظ فاصلہ رکھیں، رہنمائی اور مدد کیلئے ہیلپ لائن 130 پر رابطہ کریں۔
