چیف جسٹس لاہور ہائی کورٹ جسٹس مس عالیہ نیلم نے شیخوپورہ کے علاقے شرقپور شریف میں تحصیل کورٹس کا افتتاح کیا، اس موقع پر رجسٹرار لاہور ہائی کورٹ امجد اقبال رانجھا اور ڈسٹرکٹ اینڈ سیشن جج شیخوپورہ محمد نعیم شیخ بھی موجود تھے۔

شرقپور شریف تحصیل عدالت پہنچنے پرڈسٹرکٹ بار ایسوسی ایشن شیخوپورہ اور وکلاء کی بڑی تعداد نے چیف جسٹس مس عالیہ نیلم کاپرتپاک استقبال کیا گیا اور گلدستے بھی پیش کئے گئے، افتتاح کے موقع پر چیف جسٹس عالیہ نیلم نے خصوصی دعا بھی کی۔

افتتاحی تقریب میں عدالتی افسران، وکلا، ضلعی انتظامیہ اور پولیس کے اعلیٰ حکام سمیت مختلف شعبہ ہائے زندگی سے تعلق رکھنے والی شخصیات نے شرکت کی۔

شرکاء نے تحصیل کورٹس کے قیام کو علاقہ مکینوں کے لیے فوری اور سستے انصاف کی فراہمی کی جانب اہم پیش رفت قرار دیا۔، بعد ازاں چیف جسٹس مس عالیہ نیلم نے تحصیل کورٹ کے احاطے میں پودا لگا کر شجرکاری مہم میں حصہ لیا اور ماحول کے تحفظ کی اہمیت پر بھی زور دیا۔

انہوں نے تحصیل کورٹس کے احاطہ میں پرچم کشائی بھی کی، پولیس کے چاق و چوبند دستے نے فاضل چیف جسٹس کو گارڈ آف آنر بھی پیش کیا۔

واضح رہے کہ تحصیل شرقپور شریف میں تین عدالتیں قائم کی گئی ہیں، جن میں ایڈیشنل ڈسٹرکٹ اینڈ سیشن جج کی ایک جب کہ سول ججز کی دو عدالتیں شامل ہیں۔