محکمہ داخلہ پنجاب کے ترجمان کے مطابق صوبے میں اس وقت 39 ہولڈنگ سینٹرز فعال ہیں، جہاں 153 افغان شہری موجود ہیں، ان مراکز میں افغان باشندوں کی عارضی رہائش، رجسٹریشن اور وطن واپسی کے لیے ضروری انتظامات کیے گئے ہیں۔

ترجمان کا کہنا تھا کہ حکومت پاکستان کی پالیسی کے تحت قابلِ قبول ویزا کے بغیر پاکستان میں افغان شہریوں کا قیام غیر قانونی تصور کیا جاتا ہے، ایسے افراد کو حراست میں لے کر ہولڈنگ سینٹرز منتقل کیا جاتا ہے، جہاں قانونی اور ضروری کارروائی مکمل ہونے کے بعد انہیں طورخم بارڈر پر افغان حکام کے حوالے کر دیا جاتا ہے۔

محکمہ داخلہ نے بتایا کہ کریک ڈاؤن کے دوران پنجاب بھر کے رہائشی علاقوں اور مارکیٹس میں 4 لاکھ سے زائد سرچ آپریشن کیے جا چکے ہیں، جبکہ غیر قانونی طور پر مقیم افغان باشندوں کو جائیدادیں کرائے پر دینے کے الزام میں 803 افراد کے خلاف مقدمات بھی درج کیے گئے ہیں۔

ترجمان کا کہنا تھا محکمہ داخلہ پنجاب کا فارن نیشنل سکیورٹی ونگ ان کارروائیوں کی نگرانی اور متعلقہ اداروں کے درمیان رابطہ کاری کا ذمہ دار ہے، محکمہ داخلہ نے واضح کیا ہے کہ کارروائیوں کا ہدف صرف غیر قانونی طور پر مقیم افراد ہیں۔

محکمہ داخلہ نے شہریوں سے اپیل کی گئی ہے کہ افغان شہریوں کے غیر قانونی قیام، شناختی دستاویزات میں جعلسازی یا کسی بھی مشکوک سرگرمی سے متعلق اطلاع ایمرجنسی ہیلپ لائن 15 پر دیں، اطلاع دینے والوں کی شناخت مکمل طور پر خفیہ رکھی جائے گی