حکام نے اعلان کیا ہے کہ آر پریماداسا سٹیڈیم کے گیٹس میچ کے روز سہ پہر 3 بجے کھول دیئے جائیں گے، جبکہ شائقین کو ہدایت کی گئی ہے کہ وہ رش اور تاخیر سے بچنے کیلئے وقت سے پہلے سٹیڈیم پہنچیں۔

رپورٹس کے مطابق کولمبو شہر کے اطراف اہم شاہراہوں پر ٹریفک ڈائیورشن پلان نافذ کیا گیا ہے، اضافی پولیس نفری تعینات کی گئی ہے اور سٹیڈیم کے اطراف خصوصی سکیورٹی چیکنگ پوائنٹس قائم کیے گئے ہیں تاکہ کسی بھی ناخوشگوار صورتحال سے بچا جا سکے۔

تجزیہ کاروں کا کہنا ہے کہ پاک بھارت مقابلے کی عالمی مقبولیت کے باعث سری لنکن حکام اس میچ کو محفوظ اور کامیاب بنانے کیلئے غیر معمولی انتظامات کر رہے ہیں، جبکہ شہر میں کرکٹ بخار اپنے عروج پر پہنچ چکا ہے۔

شائقین کیلئے حلال فوڈ اور سیف زون گائیڈ جاری

دوسری جانب سٹیڈیم کے اطراف بعض سڑکیں آج میچ کے دن عارضی طور پر بند یا کنٹرول رہیں گی۔

اسی صورتحال کو مدنظر رکھتے ہوئے پاکستانی اور بھارتی شائقین کیلئے کھانے، نماز اور محفوظ واپسی کے حوالے سے 3 اہم سیف پوائنٹس تجویز کئے گئے ہیں تاکہ میچ ڈے پر کسی پریشانی کا سامنا نہ کرنا پڑے۔

گائیڈ کے مطابق پہلا اہم پوائنٹ پیٹاہ ایریا ہے، جہاں جامع الفار مسجد (ریڈ مسجد) کے اطراف حلال کھانے کے متعدد آپشنز اور نماز کی سہولت دستیاب ہے، جبکہ یہاں سے فورٹ ایریا کی جانب واپسی نسبتاً آسان رہتی ہے۔

دوسرا اہم مقام کولمبو فورٹ سٹیشن ایریا قرار دیا گیا ہے، جو شہر کا بڑا ٹرانزٹ پوائنٹ ہے اور جہاں سے بس، ٹرین اور ٹیکسی سہولت آسانی سے مل جاتی ہے، اس لئے میچ کے بعد واپسی کے لئے یہ محفوظ آپشن سمجھا جا رہا ہے۔

تیسرا سیف پوائنٹ ویلاواتے اور کولمبو ساؤتھ کا علاقہ ہے، جو فیملیز کیلئے بہتر اور نسبتاً پرسکون سمجھا جاتا ہے، جہاں حلال ریسٹورنٹس اور ساحلی روٹس کے ذریعے کم رش والے راستوں سے واپسی ممکن ہے۔

رپورٹ کے مطابق شائقین کو مشورہ دیا گیا ہے کہ میچ سے پہلے کھانا، نماز اور عبادت انہی علاقوں میں مکمل کر کے سٹیڈیم جائیں اور میچ کے بعد سٹیڈیم کے قریب رکے بغیر کم از کم 10 سے 15 منٹ پیدل چل کر کسی کھلے مقام سے سواری حاصل کریں، جبکہ فورٹ سٹیشن سائیڈ روٹ کو بیک اپ پلان کے طور پر ضرور رکھیں۔