صاف ستھری زندگی نہ گزارنے والا انسان نہ صرف بیمار ہوجاتا ہے بلکہ اپنے آپ سے اکتاہٹ بھی محسوس کرنے لگتا ہے
لاہور (روزنامہ دنیا ) کسی بھی انسان کی کی شخصیت کو نکھارنے اور صحت مند زندگی گزارنے کے لئے صفائی بہت اہم ہے ۔ اگر فرد صفائی ستھرائی کا خیال نہ رکھے تو بیمار ہونے لگتا ہے بلکہ اپنے آپ سے بھی اکتاہٹ محسوس کرتا ہے ۔ صاف نہ رہنے کی صورت میں فرد کی سماجی زندگی متاثر ہونے کا خطرہ بھی کافی حد تک بڑھ جاتا ہے کیونکہ لوگ عموماً ناپاک یا بدبو دار شخص سے کترانے لگتے ہیں ۔ صحت مند زندگی کے لئے بچوں کو بچپن سے ہی صفائی کی عادت ڈالنی چاہیے تاکہ وہ صحت مند نشوونما کے ساتھ صحت مند زندگی گزار سکیں ۔
ہمارے دین نے بھی ہمیں صفائی کی بہت تلقین کی ہے ، جیسا کہ حدیثِ مبارک بھی ہے : ـ ’’ صفائی نصف ایمان ہے ‘‘ ۔ یعنی صفائی کو اتنی اہمیت حاصل ہے کہ اِسے آدھا ایمان قرار دے دیا گیا ہے ۔ باقاعدگی سے نہانے سے انسان کا جسم پاک و صاف رہتا ہے اور بیکٹیریا اور دوسرے جراثیم بھی کم حملہ آورہوتے ہیں جس سے انسان بہت سی بیماریوں سے بچا رہتا ہے ۔ آپ کے دانت ، ناخن ، جسم ، بال یہاں تک کہ کپڑے ، گھر اور اردگرد کا ماحول تک صاف ہونا چاہیے ۔ صفائی صرف جسم سے لے کر گھر تک ضروری نہیں بلکہ کھانے اور پینے میں بھی صفائی ہونا لازمی ہے ۔
جو کھانا آپ گھر میں بنا رہے ہوں اس کو اچھی طرح دھو کر پکانا چاہیے ، لیکن اگر باہر سے کھا رہے ہوں تو اِس بات کی تصدیق کر لینی چاہیے کہ کھانا صاف ستھرے طریقے سے پکایا گیا ہو ۔ جو پانی استعمال کر رہے ہوں اُس کا بھی جراثیم سے پاک صاف ہونا لازمی ہے وگرنہ یہ بہت سی بیماریوں کا باعث بن سکتا ہے ، یہاں تک کہ جان لیوا بھی ثابت ہو سکتا ہے ۔ اِس لیے ضروری ہے اپنے کھانے پینے ، پہننے سے لے کر ہر چیز میں صفائی ستھرائی کا خیال رکھا جائے کیونکہ صحت مند زندگی ہی صحت مند مستقبل ہے ۔
