لاہور: (ویب ڈیسک) امریکا کی مشہور ٹیکنالوجی کمپنی ایپل نے صارفین کیلئے کئی نئی مصنوعات متعارف کرا دی ہیں جن میں جامنی رنگ کے آئی فون 12 سمیت کئی اپ ڈیٹس شامل ہیں۔
غیر ملکی ویب سائٹ اردو نیوز کے مطابق امریکی ٹیکنالوجی کمپنی ایپل نے رواں سال کی پہلی اہم تقریب منعقد کی ہے جس میں پرپل آئی فون 12 کے موجودہ ماڈل سمیت کئی اپڈیٹس کا اعلان کیا گیا ہے۔
ایپل کی جانب سے جاری ہونے والے بیان میں کہا گیا ہے کہ آئندہ ہفتے آئی او ایس میں نئی اپ ڈیٹس آ رہی ہیں جس میں سب سے زیادہ تبدیلیاں پرائیویسی کے حوالے سے ہوں گی۔
امریکی کمپنی کا کہنا ہے کہ نئے آئی فون 12 میں صرف رنگ کی اپ ڈیٹس کی گئی ہیں، اس کی قیمت میں کوئی ردوبدل نہیں کیا گیا، یہ اسی قیمت میں صارفین کو دستیاب ہوگا جس میں آئی فون 12 کے دیگر ماڈلز دستیاب ہیں۔
ایپل کی جانب سے جو پراڈیکٹس متعارف کرائی گئی ہیں ان میں ایم ون چِپ کے ساتھ آئی پیڈ پرو کی قیمت تین ہزار 199 درہم سے شروع ہوگی۔ اس کے علاوہ ایپل ٹی وی فور کے کی قیمت 729 درہم سے شروع ہوگی جبکہ اس کے لیے بھی آرڈرز 30 اپریل سے ہی بُک ہوں گے۔
آئی میک 24 انچ سات مختلف رنگوں میں دستیاب ہوگا جس کی قیمت ساڑھے پانچ ہزار درہم سے شروع ہوگی۔ اس کے لیے آرڈرز 30 اپریل سے لیے جائیں گے جبکہ فراہمی مئی کی 15 تاریخ کے بعد ہوگی۔
ایئر ٹیگ کی قیمت 129 درہم سے شروع ہوگی اور اس کے لیے آرڈرز 23 اپریل سے لیے جائیں گے جبکہ 30 اپریل تک ڈیلیوری ہوگی۔
