کیلیفورنیا: (ویب ڈیسک) گوگل کی جانب سے اینڈرائیڈ صارفین کیلئے ایک نیا فیچر متعارف کرانے کی تیاریاں کی جا رہی ہیں جس کو استعمال کرتے ہوئے گوگل پلے سٹور پر بیک وقت دو ایپس کو ڈاؤن لوڈ کیا جا سکے گا۔
گوگل کی جانب سے اس فیچر کے متعارف کرائے جانے کے بعد طاقتور پروسیسر کی حامل ڈیوائسز اور اچھے بینڈوتھ کا انٹرنیٹ رکھنے والے صارفین بہتر طریقے سے ڈاؤن لوڈنگ کر سکیں گے۔
2019 میں گوگل نے اس فیچر کا تجربہ کیا تھا لیکن اس کو بڑے پیمانے پر نافذ العمل نہیں کیا گیا تھا، لیکن اب ایسا ظاہر ہوتا ہے کہ کمپنی کی جانب سے یہ فیچر عالمی سطح پر صارفین کیلئے متعارف کرایا جانے والا ہے جو گوگل پلے سٹور کے استعمال میں واضح بہتری لا سکتا ہے۔
اس سے قبل گوگل پلے سٹور سے ایپلی کیشنز ایک ساتھ ڈاؤن لوڈ ہونے کے بجائے ایک کے بعد ایک ڈاؤن لوڈ ہوتی تھیں، لیکن نئے فیچر کے بعد صارفین ایک ساتھ دو ایپس کو ایک ساتھ ڈاؤن لوڈنگ پر لگا سکیں گے جو فون کی بہتر پروسیسنگ پاور انٹرنیٹ سپیڈ کو استعمال کرتے ہوئے اس کو ممکن بنائے گا۔
گوگل کی جانب سے کیا جانے والا یہ اقدام صارفین کے تجربے کو مزید بہتر کرنے میں مدد دے گا۔
