وفاقی وزیر برائے آئی ٹی و ٹیلی کمیونیکیشن شزا فاطمہ خواجہ نے ٹیلی کام بل پی ٹی آر اے کے حوالے سے اہم بیان میں کہا کہ سینیٹ سے پی ٹی آر اے (PTRA) بل واپس لینے کی درخواست جمع کرا دی گئی ہے، جبکہ تمام ضروری اور بنیادی نکات شامل کرکے جلد نیا اور جامع بل پیش کیا جائے گا۔

ان کا کہنا تھا کہ پی ٹی آر اے بل کی 90 روزہ قانونی مدت ختم ہونے کے قریب تھی، اسی لیے بل واپس لینے کا فیصلہ کیا گیا، اگر بل واپس نہ لیا جاتا تو معاملہ پارلیمنٹ کے مشترکہ اجلاس میں چلا جاتا، تاہم فی الحال مشترکہ اجلاس کے انعقاد کے حوالے سے کوئی حتمی امکان موجود نہیں تھا۔

شزا فاطمہ خواجہ نے کہا کہ قانونی عمل کو تیز اور بلا تاخیر مکمل کرنے کے لیے سینیٹ سے بل واپس لینے کی درخواست جمع کرائی گئی ہے۔

انہوں نے کہا کہ حکومت تمام ضروری اور بنیادی نکات کو شامل کرتے ہوئے جلد ایک نیا اور جامع پی ٹی آر اے بل پیش کرے گی، تاکہ متعلقہ قانونی عمل کو مؤثر انداز میں آگے بڑھایا جا سکے۔