لندن :(ویب ڈیسک) برطانوی شاہی خاندان کی نادر یادگاروں کے ذخیرے میں ایک منفرد اضافہ سامنے آیا ہے جہاں کنگ چارلس کے بچپن کے بال نیلامی کے لیے پیش کیے جا رہے ہیں۔
چارلس کے بال 1960 کی دہائی کے اوائل میں شاہی نائی جارج کرسپ نے اس وقت کاٹے تھے جب نوجوان چارلس ابھی شاہی ذمہ داریوں اور اپنی آئندہ زندگی کے بڑے ادوار سے بہت دور تھے۔
پال فریزر کلیکٹیبلزکمپنی نے اس نایاب یادگار کی قیمت 7,995 پاؤنڈ رکھی ہے، یہ کنگ چارلس سوم سے متعلق بے حد ذاتی نوعیت کی اشیا میں شمار ہوتی ہے جو شائقین کو بادشاہ کی شخصیت کے نہایت قریب لے جاتی ہے۔
واضح رہے کہ نیلامی میں صرف بال ہی شامل نہیں بلکہ کنگ چارلس کے ہاتھ سے لکھا ہوا ایک کرسمس کارڈ بھی موجود ہے جبکہ شاہی نائی جارج کرسپ کی استعمال شدہ قینچی اور کنگھی بھی اس مجموعے کا حصہ ہیں۔
رپورٹ کے مطابق جارج کرسپ نہ صرف جارج ششم کے نائی رہے بلکہ 1952 کے بعد ملکہ الزبتھ دوم کے بھی قابلِ اعتماد ہیئر ڈریسر تھے، 1960 کی دہائی میں وہ باقاعدگی سے میفر کے ٹرمپرس سے بکھنگھم پیلس جاتے تھے تاکہ نوجوان چارلس کے گھنے سیاہ بال تراش سکیں۔
یاد رہے کہ کنگھی پر "کینٹ آف لندن" کا شاہی نشان بھی موجود ہے جو شاہی خاندان کی پسندیدہ برانڈ مانی جاتی ہے۔
