واشنگٹن : (ویب ڈیسک) امریکی صدر جوبائیڈن نے دوسری بار صدر منتخب ہونے پر ڈونلڈ ٹرمپ کو مبارکباد دیتے ہوئے وائٹ ہاؤس آنےکی دعوت دے دی۔
غیر ملکی خبر رساں ادارے کے مطابق وائٹ ہاؤس سے جاری ہونے والے بیان میں کہا گیا ہے کہ امریکی صدر جوبائیڈن نے ری پبلکن پارٹی کے امیدوار ڈونلڈ ٹرمپ کو فون کرکے صدارتی انتخابات میں جیت پر مبارک باد دی۔
ترجمان وائٹ ہاؤس کے مطابق جوبائیڈن نے ڈونلڈ ٹرمپ سے ٹیلی فونک گفتگو کے دوران اقتدار کی منتقلی کویقینی بنانے کا عہد کیا اور نو منتخب صدر کو وائٹ ہاؤس آنے کی دعوت دی۔
جاری بیان میں کہا گیا کہ امریکی صدر جو بائیڈن نے ڈیموکریٹ امیدوار و نائب صدر کملا ہیرس سے ملاقات کی اور ملک کو اکٹھا کرنے کیلئے کام کرنے پر زور دیا۔
وائٹ ہاؤس کے مطابق امریکی صدر جو بائیڈن آج قوم سے خطاب کریں گے۔
خبررساں ادارے کی رپورٹ کے مطابق امریکی صدر نے 4 سال قبل وائٹ ہاؤس سے جانے والے شخص کو اوول آفس میں ملاقات کے لیے بلایا ہے تاکہ انہیں آفس کی چاپیاں دوبارہ دینے کی تیاری کی جاسکے۔
یہ بھی پڑھیں:ڈونلڈ ٹرمپ کی وائٹ ہاؤس میں واپسی ، دوسری بار امریکی صدر منتخب
ڈونلڈ ٹرمپ کی انتخابی مہم کے کمیونیکیشن ڈائریکٹر اسٹیون چیونگ نے کہا کہ ڈونلڈ ٹرمپ نے جو بائیڈن کے اقدام کو سراہا ہے اور وہ جلد ہونے والی اس ملاقات کے منتظر ہیں۔
وائٹ ہاؤس کے ایک عہدیدار نے بتایا کہ بائیڈن کے چیف آف سٹاف نے صدارتی منتقلی کو منظم طریقے سے شروع کرنے کے لیے ٹرمپ کی ٹیم پر ضروری وفاقی معاہدوں پر دستخط کرنے پر زور دیا۔
دوسری جانب ڈیموکریٹ امیدواراور نائب صدر کملا ہیرس نے صدارتی الیکشن میں نتائج قبول کرتے ہوئے شکست تسلیم کرلی ہے۔
واضح رہے کہ ڈونلڈ ٹرمپ 5 نومبر کو ہونے والے ملک کے 47ویں صدر منتخب ہوگئے جبکہ ان کے مدمقابل ڈیموکریٹک صدارتی امیدوار کملا ہیرس ووٹ حاصل کرنے میں کامیاب رہیں۔
ڈونلڈ ٹرمپ دوسری بار امریکی صدر منتخب ہوئے ہیں ، وہ پہلی بار 2016 میں انتخابات جیتے تھے تاہم 2020 کے انتخابات میں ڈیموکریٹک امیدوار جوبائیڈن نے انہیں شکست دی تھی۔
