عالمی میڈیا کی رپورٹ کے مطابق امریکی مرکزی کمان (سینیٹ کام) نے اپنے جاری بیان میں کہا کہ امریکی فوجی دستوں نے القاعدہ سے وابستہ ایک رہنما کو ہلاک کر دیا ہے جو شام میں امریکیوں پر داعش کے حملے سے منسلک تھا۔

رپورٹ میں بتایا گیا ہے کہ بلال حسن الجاسم کے داعش کے ایک مسلح شخص سے براہ راست روابط تھے جس نے 13 دسمبر کو شام کے شہر تدمر میں حملہ کر کے امریکی اور شامی اہلکاروں کو ہلاک اور زخمی کیا تھا۔

امریکی سینیٹ کام کے سربراہ ایڈمرل بریڈ کوپر نے ایک بیان میں کہاکہ 3 امریکیوں کی ہلاکت سے منسلک دہشت گرد کی موت اس بات کا اظہار ہے کہ ہم اپنی افواج پر حملہ کرنے والے دہشت گردوں کا تعاقب کرنے کے لیے پرعزم ہیں۔

یاد رہے کہ 13دسمبر 2025ء کو حملہ ہونے کے بعد سے امریکی افواج شام میں حملے کر رہی ہیں اور امریکی فوج نے کہا ہے کہ اس نے داعش کے 100 سے زیادہ اہداف کو نشانہ بنایا ہے۔

امریکی وزیر دفاع پیٹ ہیگستھ نے ایکس پر اپنی پوسٹ میں کہا کہ ہم کبھی نہیں بھولیں گے اور حملوں کی شدت کبھی کم نہیں کریں گے۔