قطر کی وزارتِ خارجہ کے ترجمان ماجد الانصاری کے مطابق امریکی وفد دوحہ میں قطری ثالثوں اور حکام کے ساتھ متعدد اہم علاقائی معاملات پر مشاورت کر رہا ہے۔ انہوں نے بتایا کہ مذاکرات میں ایران سے متعلق پیش رفت اور لبنان کی صورتحال بھی زیرِ غور آئے گی۔

ماجد الانصاری نے واضح کیا کہ امریکی وفد اس وقت ایرانی حکام کے ساتھ براہِ راست مذاکرات کے لیے دوحہ نہیں آیا۔ ان کے مطابق اس دورے کا مقصد قطری ثالثوں کے ساتھ مشاورت اور خطے کی مجموعی صورتحال کا جائزہ لینا ہے۔

انہوں نے کہا کہ قطر خطے میں سفارتی رابطوں اور کشیدگی کم کرنے کی کوششوں میں اپنا فعال کردار جاری رکھے ہوئے ہے اور مختلف فریقوں کے درمیان رابطوں کو برقرار رکھنے کے لیے بھی سرگرم ہے۔

یہ ملاقاتیں ایسے وقت میں ہو رہی ہیں جب امریکا نے خطے سے متعلق سفارتی کوششوں کو مزید تیز کرنے کے لیے ایک مذاکراتی ٹیم بھیجنے کا اعلان کیا ہے، جبکہ ایران اور امریکا کے درمیان حالیہ مفاہمتی یادداشت پر عمل درآمد سے متعلق مختلف سطحوں پر سفارتی سرگرمیاں بھی جاری ہیں۔

تجزیہ کاروں کے مطابق دوحہ میں ہونے والی یہ ملاقاتیں مشرق وسطیٰ میں کشیدگی کم کرنے، لبنان کی صورتحال پر مشاورت، ایران سے متعلق سفارتی پیش رفت اور خطے میں استحکام کے لیے جاری کوششوں کے تناظر میں اہمیت کی حامل ہیں۔