دوسری جانب روسی فضائی دفاع نے 351 یوکرینی ڈرونز کو تباہ کرنے کا دعویٰ کیا ہے۔ حملوں کے دوران روسی ای کامرس کمپنی اوزون کے متعدد لاجسٹک مراکز کو بھی نشانہ بنایا گیا۔

روسی وزارت دفاع کے مطابق رات بھر روس کے مختلف علاقوں کے علاوہ بحیرہ اسود اور بحیرہ آزوف کے اوپر 351 فکسڈ ونگ یوکرینی ڈرونز کو فضائی دفاعی نظام نے روک کر تباہ کیا۔

ڈرونز کو استراخان، بیلگورود، بریانسک، کرسک اور روستوف ریجنز، کراسنودار اور ستاوروپول کے علاقوں، جمہوریہ ادیگیا اور کریمیا سمیت بحیرہ اسود اور بحیرہ آزوف کے اوپر مار گرایا گیا۔

روستوف ریجن کے گورنر یوری سلیوسر کے مطابق روسی فضائی دفاع نے رات کے دوران علاقے کے چار شہروں اور 14 اضلاع میں 120 یوکرینی ڈرونز اور متعدد کروز میزائل تباہ کیے۔

کراسنودار میں ڈرون کا ملبہ بچوں کی ایک نجی تنصیب پر گرنے سے تین بچے ہلاک اور سات زخمی ہوگئے، علاقائی گورنر وینیامین کوندراتیف کے مطابق زخمی بچوں کو ضروری طبی امداد فراہم کی جارہی ہے، جبکہ دو بالغ افراد کو بھی ہسپتال منتقل کیا گیا۔

حملوں کے دوران روس کی بڑی ای کامرس کمپنی اوزون کے مختلف لاجسٹک مراکز بھی متاثر ہوئے۔ جمہوریہ ادیگیا میں اوزون کے ایک لاجسٹک مرکز پر ڈرون حملے کے بعد گودام میں آگ بھڑک اٹھی۔

عملے کو فوری طور پر محفوظ مقام پر منتقل کردیا گیا اور ابتدائی اطلاعات کے مطابق وہاں کوئی جانی نقصان نہیں ہوا۔ آگ پر قابو پانے کے لیے ایمرجنسی اہلکار اور متعلقہ اداروں کی ٹیمیں موقع پر پہنچ گئیں۔

داغستان کے دارالحکومت ماخاچکالا میں بھی اوزون کے لاجسٹک مرکز کو ڈرون حملے کا نشانہ بنایا گیا، جس کے نتیجے میں گودام میں آگ لگ گئی اور متعدد افراد زخمی ہوئے۔

کمپنی کے مطابق تمام حفاظتی نظام معمول کے مطابق فعال ہوئے اور عملے کو فوری طور پر عمارت سے نکال لیا گیا۔ زخمیوں کو طبی امداد فراہم کی گئی اور کمپنی کا کہنا ہے کہ ان کی زندگی کو خطرہ نہیں۔

ماخاچکالا میں متاثرہ گودام کا آپریشن غیر معینہ مدت کے لیے معطل کردیا گیا ہے۔ اوزون کے مطابق اس گودام میں موجود اشیا کو آن لائن مارکیٹ پلیس پر عارضی طور پر فروخت کے لیے بند کردیا گیا ہے، جبکہ یہاں سے مکمل ہونے والے آرڈرز منسوخ کرکے صارفین کو رقم واپس کی جائے گی۔

سکیورٹی خدشات کے باعث فروخت کنندگان سے نئی کھیپ کی وصولی بھی عارضی طور پر روک دی گئی ہے۔

کراسنودار شہر میں بھی اوزون کے ایک لاجسٹک مرکز پر ڈرون حملے کے بعد بڑے پیمانے پر آگ لگ گئی۔ ایمرجنسی سروسز نے موقع پر کارروائی شروع کردی، تاہم ابتدائی اطلاعات میں کسی جانی نقصان کی اطلاع نہیں ملی۔

ڈرون حملوں کے خطرے کے پیش نظر ادیگیا کے شہر ادیگئیسک اور ستاوروپول ریجن کے شہر نیوینومیسک میں اوزون کے گودام بھی خالی کرا لیے گئے۔

کمپنی کے مطابق ان مقامات پر کوئی ملازم زخمی نہیں ہوا اور نہ ہی گوداموں یا وہاں موجود سامان کو نقصان پہنچا، تاہم حفاظتی اقدامات کے تحت مراکز کو عارضی طور پر بند رکھا گیا ہے۔

دوسری جانب زاپوروزے ریجن کے شہر میلیتوپول میں بھی ایک رہائشی عمارت کو ڈرون حملے کا نشانہ بنائے جانے کی اطلاع ہے، حملے کے بعد ساتویں اور آٹھویں منزل پر واقع دو اپارٹمنٹس میں آگ لگ گئی، جبکہ ڈرون کا ملبہ دیگر رہائشی عمارتوں اور زیر تعمیر ڈھانچوں پر بھی گرا۔

روسی حکام کے مطابق متاثرہ علاقوں میں ایمرجنسی اور قانون نافذ کرنے والے اداروں کی ٹیمیں کام کر رہی ہیں جبکہ بعض مقامات پر نقصانات اور ممکنہ متاثرین کے بارے میں مزید معلومات اکٹھی کی جارہی ہیں۔