کراچی: (دنیا نیوز) آئندہ دو ماہ کے لئے مانیٹری پالیسی کا اعلان آج کیا جا رہا ہے، ماہرین کے مطابق موجودہ معاشی صورتحال کے باعث شرح سود میں اضافے کا خدشہ ہے۔
سٹیٹ بنک آئندہ دو ماہ کے لئے نئی زری پالیسی کا اعلان پریس ریلیز کے ذریعے آج کرے گا۔ بڑھتا ہوا تجارتی خسارہ، گرتے ہوئے زرمبادلہ کے ذخائر اور ڈالر کی بڑھتی قدر کے ساتھ ساتھ مہنگائی میں اضافے کا رجحان جاری ہے۔ ماہرین توقع کر رہے ہیں کہ سٹیٹ بینک موجودہ حالات کو مد نظر رکھتے ہوئے شرح سود میں 0.25 فیصد سے 0.50 فیصد تک کا اضافہ کر سکتا ہے۔
اس حوالے سے دنیا نیوز نے ایک سروے بھی کیا جس میں 25 ماہرِ معاشیات اور مالیاتی اداروں کے مختلف افراد سے رابطہ کیا کیا، 21 افراد کا کہنا تھا کہ مرکزی بینک شرح سود میں اضافہ کرسکتا ہے جبکہ صرف 4 افراد نے شرح سود میں اضافے کے خدشات کو رد کیا۔ واضح رہے کہ اس وقت مرکزی بینک کی شرح سود 6 فیصد پر ہے۔
