اسلام آباد: (دنیا نیوز) وزیراعظم کا بیرونی سرمایہ کاری میں اضافے کا مشن، شہباز شریف کی ہدایت پر ڈاکٹر مصدق ملک کی سربراہی میں پاکستانی کمپنیوں پر مشتمل وفد چائنہ پہنچ گیا۔
آٹھویں سلک روٹ ایکسپو میں پاکستان کو گیسٹ آف آنر ملک کا درجہ دیا گیا ہے، ایکسپو چائنہ کے شانزی صوبے کے شہر زیان میں جاری ہے، ایکسپو کی سائیڈ لائن پر خصوصی طور پر چائنہ پاکستان کانفرنس برائے معاشی و تجارتی تعاون کا انعقاد کیا گیا ہے۔
ڈاکٹر مصدق ملک نے کانفرنس سے خطاب کرتے ہوئے کہا کہ پاکستان کی ایکسپو میں شرکت وزیراعظم شہباز شریف کے حالیہ دورے کا تسلسل ہے ، ہم چائنہ کے ساتھ توانائی، معیشت ، تجارت سمیت مختلف شعبوں میں شراکت داری کے لیے پُرعزم ہیں۔
انہوں نے کہا کہ زیان شہر قدیم سلک روٹ اور بی آر آئی منصوبے کے بطور نقطہ آغاز اہمیت کا حامل ہے، چینی کمپنیوں کو پاکستانی توانائی اور پیٹرولیم شعبے میں سرمایہ کاری کی دعوت دیتے ہیں۔
وفاقی وزیر ڈاکٹر مصدق ملک کا کہنا تھا کہ مائننگ، پٹرولیم اور توانائی میں بزنس ٹو بزنس لنکیجز پر ہمارا فوکس ہے۔
