واشنگٹن: (دنیا نیوز) وزیر خزانہ محمد اورنگزیب نے وزرائے خزانہ کے اتحاد کے 13 ویں اجلاس میں شرکت کی، اجلاس میں محدود مالی وسائل اور بدلتے سیاسی حالات کے تناظر بارے غور کیا گیا۔
اجلاس میں ماحولیاتی تبدیلی سے نمٹنے اور اقتصادی ترقی کے حصول بارے تبادلہ خیال کیا گیا، وزیر خزانہ محمد اورنگزیب نے وزرائے خزانہ اجلاس سے خطاب کیا، پاکستان کی جانب سے ماحولیاتی تبدیلی سے نمٹنے کی کوششوں پر روشنی ڈالی۔
وزارت خزانہ کے مطابق محمد اورنگزیب نے ماحولیاتی مسائل کے مؤثر حل بارے پاکستان میں تیار کردہ کلائمیٹ پراسپیرٹی پلان بارے آگاہ کیا، وزیر خزانہ نے کلائمیٹ فنانس سٹریٹجی کے بارے میں شرکا کو آگاہ کیا۔
ورلڈ بینک کے ساتھ دس سالہ کنٹری پارٹنرشپ فریم ورک بارے روشنی ڈالی گئی، فریم ورک کے تحت ماحولیاتی تبدیلیوں بارے بطور ستون شامل کرنے بارے آگاہ کیا گیا، وزیر خزانہ نے آئی ایم ایف کے ساتھ سٹاف لیول معاہدہ کا بھی ذکر کیا۔
.jpg)
وزارت خزانہ کے مطابق محمد اورنگزیب نے ماحولیاتی اقدامات، پہلوؤں کی معاشی، مالیاتی پالیسیوں میں شمولیت پر زور دیا، وزیر خزانہ نے سرکاری اور نجی شعبوں میں صلاحیت کو بہتر بنانے کو ایک چیلنج قرار دیا۔
اجلاس میں وزیر خزانہ نے سرمایہ کاری، مالی معاونت کے لیے موزوں، ہم آہنگ منصوبہ جات کی اہمیت کو اجاگر کیا۔
ماحولیاتی اقدامات کے لیے قائم وزرائے خزانہ کے اتحاد میں 90 سے زائد ممالک شامل ہیں، وزرائے خزانہ کے اتحاد میں 25 ادارہ جاتی پارٹنرز بھی شامل ہیں۔
اجلاس کا مقصد ماحولیاتی تبدیلی سے نمٹنے میں وزرائے خزانہ کے قائدانہ کردار کو مضبوط کرنا ہے، اقتصادی پالیسیوں کو ہم آہنگ، کاربن کے اخراج میں کمی جیسے اقدامات کو یقینی بنانا ہے۔
