کراچی: (دنیا نیوز) ایشین ڈویلپمنٹ بینک کے ایک اعلیٰ سطح کے 7 رکنی وفد نے سندھ کے سینئر وزیر شرجیل انعام میمن سے ملاقات کی۔
ملاقات میں ریڈ لائن بی آرٹی منصوبے کی موجودہ صورتحال، تکنیکی رکاوٹوں اور کنسلٹنٹس کی کارکردگی سمیت دیگر اہم امور پر تبادلہ خیال کیا گیا۔
سینئر صوبائی وزیر شرجیل انعام میمن نے وفد کو منصوبے میں درپیش مسائل پر تفصیلی بریفنگ دی، ملاقات میں فریقین نے ریڈ لائن بی آر ٹی منصوبے کو وقت پر اور کامیابی سے مکمل کرنے کے عزم کا اعادہ کیا۔
شرجیل انعام میمن نے کہا کہ ریڈ لائن بی آر ٹی منصوبہ شہری آبادی والے گنجان علاقے سے گزر رہا ہے، جہاں یوٹیلٹیز کی منتقلی ایک بڑا مسئلہ ہے۔
سینئر صوبائی وزیر نے کہا کہ یہ منصوبہ ہمارے لیے نہایت اہم ہے، اس کے راستے میں پانچ بڑی جامعات واقع ہیں، جو لاکھوں شہریوں کو فائدہ پہنچائے گا۔
