اسلام آباد: (دنیا نیوز) اقتصادی رابطہ کمیٹی نے الیکٹریکل وہیکل پالیسی کی منظوری دے دی۔
وزیر خزانہ محمد اورنگزیب کی صدارت میں اقتصادی رابطہ کمیٹی کا اجلاس ہوا جس میں اہم فیصلے کیے گئے۔
اجلاس کے اعلامیہ کے مطابق امتحانات میں ٹاپ پوزیشن ہولڈرز طلبہ کو مفت ای بائیکس فراہم کی جائیں گی، ای بائیکس اور رکشوں پر سبسڈی کیلئے 9 ارب روپے کے فنڈز کی منظوری دی گئی۔
وزارت خزانہ کے مطابق سال 26-2025 میں 1 لاکھ 16 ہزار ای بائیکس دی جائیں گی، اسی عرصہ کے دوران 3,170 ای رکشوں پر سبسڈی فراہم ہوگی۔
پہلے مرحلے میں 40 ہزار بائیکس، 1,000 رکشے جلد فراہم کیے جائیں گے، ترسیلات زر سکیم کے واجبات کی ادائیگی کیلئے ضمنی گرانٹ منظور کر لی گئی، اجلاس میں واجبات کی ادائیگی کیلئے 30 ارب روپے کی ضمنی گرانٹ منظور کی گئی۔
اجلاس کے شرکا کو بریفنگ دی گئی کہ ترسیلات زر سکیم کے واجبات 58.26 ارب روپے تک پہنچ گئے، گرانٹ پر عملدرآمد کیلئے وزارت خزانہ کو سٹیٹ بینک سے مل کر کام کرنے کی ہدایت کی گئی۔
سکیم کا مالی تجزیہ اور رپورٹ 15 ستمبر تک ای سی سی کو پیش کرنے کی ہدایت کر دی گئی۔
وزارت خزانہ کے مطابق اجلاس میں قائداعظم یونیورسٹی کیلئے 2 ارب روپے کی بیل آؤٹ گرانٹ کی منظوری دی گئی، یونیورسٹی کو مالی خود کفالت کا منصوبہ جلد پیش کرنے کی ہدایت کی گئی۔
