واشنگٹن:(دنیا نیوز) وفاقی وزیر خزانہ سینیٹر محمد اورنگزیب آئی ایم ایف اور ورلڈ بینک کے سالانہ اجلاسوں میں شرکت کے لیے امریکہ پہنچ گئے۔
امریکہ کے شہر واشنگٹن میں سفارت خانہ پاکستان کے اعلیٰ افسران نے وزیر خزانہ اور وفد میں شامل دیگر اہم ارکان کا استقبال کیا، محمد اورنگزیب اپنے دورہ امریکہ کے دوران ورلڈ بینک اور آئی ایم ایف کے پلینری (PLENARY) اجلاسوں میں پاکستان کی نمائندگی کریں گے۔
اُن کی دورہ امریکہ کے دوران آئی ایم ایف ، ورلڈ بینک، انٹرنیشنل فنانس کارپوریشن (IFC) اور ملٹی لیٹرل انویسٹمنٹ گارنٹی ایجنسی (MIGA) کے اعلیٰ حکام سے ملاقاتیں کریں گے۔
وزیر خزانہ کی عالمی بینک کے صدر اجے بنگا سے بالمشافہ ملاقات ہو گی، جے بنگا کی خصوصی دعوت پر اُن کی جانب سے منتخب ممالک کے وزرائے خزانہ کو دیے گے، عشائیہ میں شریک ہوں گے جب کہ G24 اور مشرق وسطیٰ، شمالی افریقہ اور پاکستان (MENAP) ممالک کے پلیٹ فارم پر آئی ایم ایف کی مینجنگ ڈائریکٹر کرسٹلینا جارجیوا سے بھی ملاقات ہو گی۔
محمد اورنگزیب MENAP کے فورم سے بطور کلیدی مقرر خطاب کریں گے اور ایف بی آر کی ڈیجیٹل ٹرانسفارمیشن کے حوالے سے عالمی بینک کے زیر اہتمام منعقدہ علاقائی راؤنڈ ٹیبل میں شرکت کریں گے، راؤنڈ ٹیبل میں ایف بی آر حکام کے علاوہ دیگر ممالک کے ٹیکس حکام بھی اپنی ٹیکس اصلاحات کو اُجاگر کیاجائے گا۔
وزیر خزانہ ورلڈ اکنامک فورم (WEF) کے زیر اہتمام دو اہم ایونٹس میں شریک ہوں گے،دورہ کے دوران چین، برطانیہ، سعودی عرب، ترکیہ اور آذربائیجان کے ہم منصب قائدین سے ملاقاتیں کریں گے، اُن کی وائٹ ہاؤس کے اعلیٰ حکام سے ملاقاتیں بھی شیڈول کا حصہ ہیں۔
محمد اورنگزیب کی کانگرس کی فنانشل سروسز کمیٹی کے چئیر مین سے بھی ملاقات ہو گی، امریکہ کے ٹریثری ڈیپارٹمنٹس اور انٹرنیشنل ڈویلپمنٹ فنانس کارپوریشن (ڈی ایف سی) کے اعلیٰ حکام سے بھی ملیں گے، یو ایس پاکستان بزنسل کونسل کے عہدہ داران و ارکان سے ٹیکس تجاویز اور پاکستان میں سرمایہ کاری کے مواقع پر گفتگو کریں گے۔
دورہ کے دوران وزیر خزانہ کی عالمی کریڈٹ ریٹنگز ایجنسیوں، کمرشل بینکوں بالخصوص مشرق وسطی کے سرمایہ کار بینکوں کے حکام سے بھی ملاقاتیں ہوں گی، وہ مختلف سرمایہ کاری فورمز اور سیمنارز سے خطاب کے دوران ملک کے معاشی منظر نامے کو واضح کریں گے۔
اس کے علاوہ محمد اورنگزیب امریکہ کے معروف تھنک ٹینکس بشمول اٹلانٹک کونسل اور پیٹرسن انسٹی ٹیوٹ آف انٹرنیشنل اکنامکس(PIIE) کا دورہ کریں گے اور پاکستانی کمیونٹی کے سرکردہ ارکان سے بھی ملاقات کریں گے جبکہ منتخب بین الاقوامی اور امریکی ذرائع ابلاغ کے نمائندوں کو بھی انٹرویوز دیں گے۔
خیال رہے وزیر خزانہ اپنے چھ دن کے دورہ کے دوران پینسٹھ سے زائد ایونٹس،فورمز، تقریبات، نشستوں اور ملاقاتوں میں شریک ہوں گے۔
