اسلام آباد: (دنیا نیوز) وزیر ہوا بازی خواجہ آصف نے کہا ہے کہ برطانیہ کے لیے قومی ایئرلائن اور ایک نجی ایئرلائن کی اپروول بہت بڑا بریک تھرو ہے۔
وزیر ہوابازی خواجہ آصف کا کہنا تھا کہ 25 اکتوبر کو اسلام آباد سے مانچسٹر پہلی پرواز جا رہی ہے، مزید نجی ایئرلائنز کی بھی برطانیہ فلائٹس میں دلچسپی ہے۔
انہوں نے کہا کہ پی ٹی آئی دور حکومت میں ہماری ایوی ایشن انڈسٹری کی بہت تباہی بربادی ہوئی ہے، امریکا کی براہ راست پروازوں کے حوالے سے مثبت پیش رفت سامنے آئی ہے،امید ہے یو ایس کے لیے پروازوں کی اجازت بھی مل جائے گی، قومی ایئرلائن کی پرائیویٹائزیشن اب چند ہفتوں کی بات ہے۔
ان کا کہنا تھا کہ پرائیویٹائزیشن کے بعد قومی ایئرلائن بیڑے میں نئے جہازوں کی شمولیت ہوگی، نئے جہاز بیڑے میں شامل ہونے کے بعد چائنہ یورپ سمیت ایسٹ میں بھی پروازیں چلا سکتے ہیں۔
خواجہ آصف نے کہا کہ قومی ایئرلائن کی پرائیویٹائزیشن کی وجہ سے مزید سرمایہ کاری نہیں کرنا چاہتے، ہماری حکومت نے ریگولیٹری سائیڈ پر جو رکاوٹیں تھیں وہ ختم کروا دیں۔
