ڈھاکا: (دنیا نیوز) وفاقی وزیر پٹرولیم علی پرویز ملک نے ڈھاکا میں بنگلہ دیش کے اعلیٰ حکام کے ساتھ اہم ملاقاتیں کیں۔
ترجمان پٹرولیم ڈویژن کی جانب سے جاری بیان کے مطابق وفاقی وزیر نے مشیر برائے امور خارجہ محمد توحید حسین سے ملاقات کی۔
دونوں فریقوں کی طرف سے پاکستان اور بنگلہ دیش کے درمیان ادارہ جاتی میکانزم کے اجلاسوں کی بحالی پر اظہار اطمینان اور رابطہ، توانائی اور قدرتی وسائل سمیت مختلف شعبوں میں تعاون کے مواقع کو مزید بڑھانے پر اتفاق کیا گیا۔
اس موقع پر بنگلہ دیشی مشیر خارجہ نے پاکستان اور بنگلہ دیش کے درمیان براہ راست پروازوں کی بحالی کی اہمیت پر زور دیا۔
یہ بھی پڑھیں: پاکستان اور بنگلا دیش کے درمیان اقتصادی تعاون کے فروغ پر اتفاق
وفاقی وزیر سے مشیر برائے تجارت، ٹیکسٹائل، سول ایوی ایشن اور سیاحت شیخ بشیر الدین اور مشیر برائے توانائی و معدنی وسائل محمد فوزل کبیر خان نے بھی ملاقات کی، ملاقات میں دوطرفہ تجارتی تعاون کو بڑھانے اور توانائی کے شعبے میں باہمی تعاون پر تبادلہ خیال کیا گیا۔
وفاقی وزیر علی پرویز ملک نے 20 سال بعد مشترکہ اقتصادی کمیشن کے اجلاس کو خوش آئند قرار دیتے ہوئے کہا کہ پاکستان اور بنگلہ دیش کے تعلقات میں ایک نئے باب کا آغاز ہوا ہے، انہوں نے بنگلہ دیش کی طرف سے کی گئی شاندار مہمان نوازی کا بھی شکریہ ادا کیا۔
