کراچی: (دنیا نیوز) پاکستان سٹاک ایکسچینج میں تیزی کے بعد مندی چھاگئی جس کے باعث ہنڈرڈ منفی زون میں بند ہوا۔
کاروباری ہفتے کے دوسرے روز بھی کاروبار کے آغاز پر سٹاک مارکیٹ میں تیزی دیکھنے میں آئی، 1000 سے زائد پوائنٹس کے اضافے کے ساتھ پاکستان سٹاک ایکسچینج میں ہنڈرڈ انڈیکس ایک لاکھ 71 ہزار 922 پوائنٹس کی بلند ترین سطح پر پہنچ گیا۔
تاہم ٹریڈنگ کے دوران سٹاک مارکیٹ میں اچانک مندی چھاگئی جو کاروباری روز کے اختتام تک برقرار رہی جس کے باعث ہنڈرڈ انڈیکس 294 پوائنٹس کی کمی کیساتھ ایک لاکھ 70 ہزار 447 پوائنٹس کی سطح پر بند ہوا۔
جن اہم شعبوں میں خریداری کا رجحان جاری ہے ان میں آٹوموبائل اسمبلرز، سیمنٹ، فرٹیلائزر، تیل و گیس کی تلاش کرنے والی کمپنیاں، آئل مارکیٹنگ کمپنیاں (او ایم سیز)، بجلی پیدا کرنے والے ادارے اور ریفائنریاں شامل ہیں، پی او ایل، او جی ڈی سی، ماری، حبکو، پی پی ایل اور ایس ایس جی سی مثبت زون میں دکھائی دیئے۔
واضح رہے کہ گزشتہ کاروباری دن کے اختتام پر پاکستان سٹاک مارکیٹ میں ہنڈرڈ انڈیکس 876 پوائنٹس کے اضافے کے ساتھ ایک لاکھ 70 ہزار 741 پوائنٹس کی سطح پر بند ہوا تھا۔
