اسلام آباد: (دنیا نیوز) خصوصی سرمایہ کاری سہولت کونسل (ایس آئی ایف سی) کی مربوط حکمتِ عملی پاکستان میں سرمایہ کاری کیلئے روشن مستقبل کی نوید
ایس آئی ایف سی کی انقلابی اصلاحاتی نے پاکستان کی معیشت کو غیر ملکی سرمایہ کاری، اعتماد اور معاشی استحکام کی نئی بلندیوں تک پہنچا دیا ہے، پاکستان کی مستحکم معاشی بنیادیں اور معاشی پیش رفت قومی خوشحالی اور سرمایہ کاری کے روشن مستقبل کی نوید ہیں۔
مشیر خزانہ خرم شہزاد نے ایس آئی ایف سی کی اہمیت کو اجاگر کرتے ہوئے کہا کہ ایس آئی ایف سی ایک اہم پلیٹ فارم ہے اس کا اصل مینڈیٹ سہولت کاری ہے، گزشتہ چند سالوں میں ایس آئی ایف سی نے سرمایہ کاروں کے اعتماد کو مضبوط کیا اور آج اس محنت کے نتائج واضح ہیں۔
ان کا کہنا تھا کہ ایس آئی ایف سی نے بیوروکریٹک رکاوٹیں ختم کر کے سرمایہ کاروں کیلئے ایک مربوط اور موثر پلیٹ فارم فراہم کیا، پاکستان کی معاشی ترقی کیلئے سرمایہ کاروں کو مکمل سکیورٹی اور موثر سہولت کاری کی فراہمی میں عسکری قیادت کا کلیدی کردار ہے۔
انہوں نے کہا کہ ایس آئی ایف سی کی ون ونڈو پالیسی نے سرمایہ کاروں کیلئے سہولت کاری، مسائل کا فوری حل اور کاروباری ماحول میں شفافیت کو ممکن بنایا۔
خرم شہزاد کا کہنا تھا کہ پاکستان کے صنعتی اور کاروباری شعبوں میں پیداواریت اور افادیت بڑھانے کیلئے ایس آئی ایف سی نے موثر اقدامات کئے، پاکستان کی معاشی اصلاحات کی بدولت بین الاقوامی سرمایہ کار امریکا، سعودی عرب، قطر، ترکی اور چین میں سرمایہ کاری میں دلچسپی بڑھا رہے ہیں۔
مشیر خزانہ نے کہا کہ پاکستان میں مضبوط میکرو اکنامک استحکام کے فروغ اور سرمایہ کاری کے ماحول کو شفاف بنانے میں ایس آئی ایف سی کا کردار بے مثال اور قابلِ ستائش ہے، مستقبل میں سرمایہ کاری کے بڑھتے مواقع اور معاشی استحکام کے سفر میں ایس آئی ایف سی کا کردار انتہائی اہم اور کلیدی ہوگا۔
ایس آئی ایف سی کی ہمہ جہت حکمتِ عملی نے پاکستان کو عالمی سرمایہ کاری کیلئے پرکشش ہب اور سرمایہ کاروں کے اعتماد کا مرکز بنا دیا ہے۔
