ریاض: (دنیا نیوز) وفاقی وزیر علی پرویز ملک کی سعودی عرب کے وزیرِ صنعت و معدنی وسائل بندر ابراہیم الخریف سے ملاقات ہوئی جس میں معدنیات اور کان کنی کے شعبے میں دوطرفہ تعاون کو مزید مضبوط بنانے پر اتفاق کیا گیا۔
سعودی وزیر معدنیات نے کہا کہ معدنی شعبے میں پاکستان اور سعودی عرب میں تعاون کے وسیع مواقع موجود ہیں، سعودی عرب اپنی علمی و تکنیکی مہارت کے ذریعے معدنی شعبے میں پاکستان سے تعاون کرے گا ، فیوچر منرلز فورم میں پاکستان کی شرکت پر مشکور ہیں۔
وفاقی وزیر علی پرویز ملک نے کہا کہ ٹیٹھیان بیلٹ میں بے پناہ معدنی صلاحیت ہے جس کا ریکو ڈک ایک چھوٹا حصہ ہے، جیولوجیکل سروے پاکستان سعودی جیولوجیکل سروے کے ساتھ تعاون پر کام کر رہا ہے، کھاد کی پیداوار اور طبی آلات کی تیاری کے شعبے بھی مشترکہ منصوبوں کے لیے اہم مواقع ہیں۔
پاکستان میں سعودعرب کے سفیر سعودی سفیر نواف بن سعید المالکی بھی ملاقات میں موجود تھے، انہوں نے کہا کہ فورم میں پاکستان کی موجودگی سعودیہ پاکستان کے دیرینہ تعلقات کو مزید مضبوط کرے گی۔
