لاہور: (دنیا نیوز) کینگروز کے ہاتھوں درگت کے بعد نڈھال شاہین وطن واپس پہنچ گئے۔ چار کھلاڑی ہیڈ کوچ اور دیگر ٹیم آفیشل دبئی کے راستے رات گئے لاہور پہنچ گئے۔
ایک، دو نہیں، لگاتار پانچ مرتبہ شکست، شاہینوں کو آسٹریلیا کے خلاف ہوم سیریز میں پانچ صفر کی عبرتناک ناکامی ہوئی۔ شکست کا بوجھ ناتواں کاندھوں پر لیے قومی کھلاڑی واپس پہنچے، محمد عامر، امام الحق ، عمر اکمل، عابد علی، ہیڈ کوچ مکی آرتھر اور دیگر ٹیم آفیشلز پرواز ای کے 622 سے براستہ دبئی علامہ اقبال انٹرنیشنل ائیرپورٹ پہنچے۔
چہروں پر تھکاوٹ اور مایوسی لیے تمام کھلاڑی میڈیا کا سامنا کرنے سے کتراتے رہے، صحافیوں کے بارہا پوچھنے پر بھی کسی سوال کا جواب نہ دیا اور سرجھکائے بس میں سوار ہو کر گھروں کو لوٹ گئے۔
قومی ٹیم کو تاریخ میں پہلی بار ہوم سیریز میں پانچ صفر کے کلین سویپ کی خفت کا سامنا کرنا پڑا ہے جبکہ ورلڈ کپ سے پہلے ایسی کارکردگی نے قوم پر واضح کر دیا ہے کہ میگا ایونٹ میں قومی ٹیم سے زیادہ امیدیں وابستہ نہ رکھی جائیں۔
