اسلام آباد: (دنیا نیوز) صدر مملکت ڈاکٹر عارف علوی نے پشاور زلمی کے کپتان ڈیرن سیمی کو پاکستان کی اعزازی شہریت دینے کی درخواست منظور کرلی۔ پاکستان کی جانب سے ڈیرن سیمی کو 23 مارچ یومِ پاکستان پر اعزازی شہریت دی جائے گی۔
پی سی بی نے ٹوئٹر پراعلان کیا کہ پاکستان کیلئے خدمات پر ڈیرن سیمی کو اعزازی شہریت دینے کا فیصلہ کیا گیا۔ پی ایس ایل کے 5 ویں ایڈیشن کی ٹرافی کی تقریب رونمائی کے دوران فرنچائز پشاور زلمی کے مالک جاوید آفریدی نے ڈیرن سیمی کیلئے صدر مملکت سے اعزازی شہریت کی درخواست کی تھی۔ انہوں نے کہا تھا کہ پشاور زلمی کے کپتان ڈیرن سیمی پاکستان کیلئے کافی مثبت جذبات رکھتے ہیں اور انہیں اعزازی شہریت دی جائے۔
President of Pakistan Dr @ArifAlvi will confer the highest civilian award and honourary citizenship to Darren Sammy on 23 March for his invaluable contribution to cricket in Pakistan. pic.twitter.com/mn9AiLknB0
— PCB Media (@TheRealPCBMedia) February 22, 2020
پشاور زلمی کے کپتان ڈیرن سیمی اکثر سوشل میڈیا پر پاکستان سے محبت کا اظہار منفرد انداز میں کرتے رہتے ہیں اور پاکستانی شہری بھی ان کو بہت پسند کرتے ہیں اور ان کی محبت کا جواب والہانہ پیار سے دیتے ہیں۔ یہ کہنا غلط نہیں ہو گا کہ وہ پاکستانی مداحوں کی جانب سے سب سے زیادہ پیار سمیٹنے والے غیر ملکی کھلاڑی ہیں۔
واضح رہے کہ دو سال قبل چیئرمین پی سی بی احسان مانی نے بھی ڈیرن سیمی کو پاکستانی شہریت دینے کا مطالبہ کیا تھا۔ انہوں نے کہا تھا کہ ڈیرن سیمی نے پاکستان کیلئے سفیر کا کام کیا ہے اس لئے ان کو پاکستان کی اعزازی شہریت دی جانی چاہئے۔
