نئی دہلی: (ویب ڈیسک) بھارتی میڈیا نے ایک بار پھر دعویٰ کیا ہے کہ انڈین ٹیم چیمپئنز ٹرافی کے میچز کھیلنے پاکستان نہیں جائے گی۔
آئی سی سی چیمپئنز ٹرافی 2025 کی میزبانی پاکستان کے پاس ہے اور چیمپئنز ٹرافی فروری مارچ 2025 میں کھیلی جانی ہے، پاکستان نے آئی سی سی سے چیمپئنز ٹرافی کا شیڈول بھی شیئر کر دیا ہے جس کے مطابق بھارت کے تمام میچز لاہور کے قذافی سٹیڈیم میں رکھے گئے ہیں۔
پی سی بی کی جانب سے جاری شیڈول کے مطابق روایتی حریف پاکستان اور بھارت کا میچ یکم مارچ کو قذافی سٹیڈیم میں رکھا گیا ہے تاہم بی سی سی آئی کی جانب سے تاحال بھارتی ٹیم کے پاکستان جانے کے حوالے سے کسی قسم کی تصدیق یا تردید نہیں کی گئی ہے۔
تاہم اب بھارتی میڈیا کی جانب سے ایک بار پھر دعویٰ کیا جا رہا ہے کہ انڈین ٹیم چیمپئنز ٹرافی کھیلنے پاکستان نہیں آئے گی اور چیمپئنز ٹرافی کے کچھ میچز ہائبرڈ ماڈل پر متحدہ عرب امارات یا پھر سری لنکا میں ہوں گے۔
بھارتی میڈیا رپورٹ کے مطابق اس بات کے قوی امکانات ہیں کہ انڈین ٹیم پاکستان نہیں جائے گی تاہم اس بارے میں حتمی فیصلہ حکومت نے کرنا ہے، چیمپئنز ٹرافی کے لیے ہائبرڈ ماڈل پر کام ہو رہا ہے اور ہو سکتا ہے کہ ایشیا کپ کی طرح بھارت اپنے میچز سری لنکا یا پھر متحدہ عرب امارات میں کھیلے۔
دوسری جانب چیئرمین پی سی بی محسن نقوی واضح طور پر کہہ چکے ہیں کہ چیمپئنز ٹرافی کی میزبانی پاکستان کو ملی ہے اور پورا ٹورنامنٹ پاکستان میں ہی کھیلا جائے گا، سری لنکا میں جولائی کے آخر میں ہونے والی آئی سی سی کی میٹنگ میں بھی اس معاملے کو اٹھایا جائے گا۔
