دبئی: (ویب ڈیسک) انٹرنیشنل کرکٹ کونسل ( آئی سی سی) نے نئی ٹیسٹ رینکنگز جاری کردیں۔
نئی ٹیسٹ رینکنگ میں قومی کرکٹر بابر اعظم کی 3 اور شاہین آفریدی کی 4 درجے تنزلی ہوئی ہے۔
آئی سی سی ٹیسٹ رینکنگ کے مطابق انگلینڈ کے جوروٹ کی پہلی پوزیشن برقرار ہے جب کہ نیوزی لینڈ کے کین ولیمسن دوسری اور بھارت کے یشسوی جیسوال 2 درجےبہتری کےبعد تیسری پوزیشن پر آگئے ہیں۔
رینکنگ میں بھارتی ٹیم کے سابق کپتان ویرات کوہلی ساتویں نمبر پر پہنچ گئے، قومی ٹیم کے وکٹ کیپر بلے باز محمد رضوان 19ویں نمبرپر آگئے جبکہ بابراعظم 3 درجے تنزلی کے بعد 15ویں پوزیشن پر چلے گئے ہیں۔
اسی طرح ٹیسٹ ٹیم کی نئی بولنگ رینکنگ میں بھارت کے جسپریت بمرا کا بدستور پہلی پوزیشن پر قبضہ اور روی چندرن ایشون کی دوسری پوزیشن برقرار ہے، نئی رینکنگ میں قومی ٹیم کے فاسٹ باؤلر شاہین آفریدی 4 درجے تنزلی کے بعد 14 ویں نمبرپرچلےگئے ہیں۔
