لاہور: (دنیا نیوز) نیوزی لینڈ کے خلاف سیریز کی تیاری کے لیے پاکستان کے ٹی 20 سکواڈ کا ٹریننگ کیمپ آج سے لاہور میں شروع ہوگا۔
پی سی بی ذرائع کے مطابق پاکستان مینز ٹی 20 کرکٹ ٹیم کے رواں ماہ دورہ نیوزی لینڈ کے لیے تربیتی کیمپ آج سے 10 مارچ تک لاہور میں ہو گا، قومی کرکٹ ٹیم رات 9 بجے سے ٹریننگ کرے گی۔
ٹریننگ سے قبل ٹیم کا ایک رکن میڈیا سے گفتگو کرے گا، 8 اور 9 مارچ کو بھی قومی کرکٹ ٹیم رات 9 بجے سے ایل سی سی اے گراؤنڈ میں ٹریننگ سیشن میں حصہ لے گی۔
واضح رہے کہ قومی ٹیم 12 مارچ کو نیوزی لینڈ روانہ ہو گی، پاکستان اور نیوزی لینڈ کے درمیان پانچ ٹی 20 میچوں کی سیریز 16 مارچ کو شروع ہو گی، ٹی 20 سیریز کے بعد 29 مارچ سے تین ون ڈے میچوں کی سیریز بھی کھیلی جائے گی۔
