ڈونیڈن: (ویب ڈیسک) نیوزی لینڈ کے ہاتھوں دوسرے ٹی20 انٹرنیشنل میں شکست کے بعد فاسٹ باؤلر حارث رؤف نے غصہ سابق کرکٹرز پر نکال دیا۔
میچ کے بعد پریس کانفرنس کرتے ہوئے فاسٹ باؤلر حارث رؤف نے کہا ہے کہ پاکستان میں لوگ ٹیم کے ہارنے کا انتظار کرتے ہیں تاکہ تنقید کرسکیں، نیوزی لینڈ کی کنڈیشنز آسان نہیں، ہر کھلاڑی اپنا 100 فیصد کھیل پیش کرنے کی کوشش کررہا ہے۔
انہوں نے کہا کہ کیوی بیٹرز نے کچھ اچھے شارٹس کھیلے اور کچھ قسمت نے انکا ساتھ دیا، ہم وہ ہی کرکٹ کھیلنے کی کوشش کر رہے ہیں جو جدید کرکٹ کا تقاضا ہے۔
ایک سوال کے جواب میں انہوں نے کہا کہ نوجوان کھلاڑیوں کو سپورٹ نہیں کریں گے تو کیسے آگے بڑھا جاسکتا ہے؟ ان کو پاکستان کی طرف سے کھیلنے کا موقع ملا ہے، انہیں تھوڑا وقت لگے گا۔
حارث رؤف نے مزید کہا ہے کہ ڈومیسٹک سے سیدھا انٹرنیشنل سطح پر آ کر پرفارم کرنا مشکل ہوتا ہے، کنڈیشنز کو سمجھنے اور پریشر میں پرفارم کرنے کیلئے انہیں کچھ وقت دینا چاہیے۔
خیال رہے کہ نیوزی لینڈ نے دوسرے ٹی 20 میچ میں پاکستان کو 5 وکٹوں سے شکست دیکر سیریز میں 0-2 کی برتری حاصل کرلی ہے۔
